Friday, March 31, 2017

N'wapi?

Menihifadhia penzi,
Lije nitoe simanzi,
N'wapi eeh laazizi,
Mwenzio nakungojea.

N'wapi hebu nambie,
Liliko nilif'atie,
Tangu moyoni 'nijie,
Siwachi kukuwazia.

N'wapi umelificha,
Nalingoja usiku kucha,
Moyoni napata "torture",
Mawazo yanizidia.

Nimezama nimezama,
Moyo wangu kutuwama,
Sikia ninavyohema,
Moyo wenda peapea.

N'wapi huko uliko,
Niambie neno lako,
Lenye haki si zindiko,
Moyo upate tulia.

Nikilala nakuota,
Kwani lini nakupata?
Wajua kwako 'megota,
Wataka mie ugua?

N'wapi nikufuate?
N'fanyeje nikupate?
N'wapi mi' nikukute?
Moyo'ngu wataka jua.

Fadhy Mtanga,
Mbeya,  Tanzania.
Ijumaa, Machi 31, 2017.

Tuesday, March 28, 2017

Vile Ulivyo

Vile we' utembeavyo,
Kwa mikogo,
Ndivyo univutiavyo,
Si kidogo.

Vile unitazamavyo,
Ooh walah!
Ndivyo unimalizavyo,
Mie hoi.

Na rangi yako ilivyo,
Asilia,
Kwa namna ing'aavyo,
Yavutia.

Vile neno usemavyo,
Shamshamu,
Sauti ikutokavyo,
Kwa utamu.

Umbo zuri vivyo hivyo,
Mashaallah!
Linoge vile wendavyo,
Inshaallah.

Hata hivi nandikavyo,
Kwa utenzi,
Ndo hivyo nikuwazavyo,
Sijiwezi.

Fadhy Mtanga,
Mbeya, Tanzania.
Jumanne, Machi 28, 2017.

Sunday, February 19, 2017

Our Pain

Your pain,  yet more my pain,
Aliandika Armando Guebuza,
Sasa kimewakumba kitu gani,
Hata kwenu mwatufukuza?

Your pain,  yet more my pain,
Tulifundishwa hadi shuleni,
Maumivu  mwenu mioyoni,
Yakawa yetu pia nchini.

Your pain,  ikawa yetu pain,
Kamwe hatukuwaacha nyuma,
Tulihamasishana nchini,
Kilimanjaro hadi Kigoma.

Your pain,  ilijaa hisia,
Sauti kali ya Kiafrika,
Yeyote iliyemfikia,
Hakika alihamasika.

Kusini kwa mto Ruvuma,
Tulijua mwateseka,
Tukawapa ofisi Nkrumah,
Ili mipango kupangika.

Our pain, never your pain,
Leo hii mwatufukuza?

Fadhy Mtanga,
Njombe.
Jumamosi, Februari 18, 2017