Tuesday, December 3, 2013

Ya'ani?

Hino si sino yaani, siy’echi yalo ngamani,
Neno ndilo mdomoni, waama sina utani,
Ushanijaa moyoni, sifurukuti yaani,
Ya’ani kuficha?

Siyo mboni ‘lo jichoni, bali moyo ‘lo moyoni,
Maneno tupu sineni, nakutenda yalo shani,
Meshiba mie pendoni, nakupendaje yaani,
Ya’ani kuficha?

Vijinopembe pembeni, yawachome mioyoni,
Nishazama ‘mo rahani, nilotopea dimbwini,
Dimbwini ‘ko mahabani, mbona ‘na raha
yaani,
Ya’ani kuficha?

Jamani mie jamani, msin’ulize ‘na nini,
Nimependa duniani, sisikii ‘la sioni,
Guuni ‘di utosini, sijielewi yaani,
Ya’ani kuficha?

Kote kote duniani, mwingine ‘tomtamani,
Nitataka tena nini, na sitaki abadani,
Nihangaike kwa’ani, basi n’wehuke yaani,
Ya’ani kuficha?

Mlo na gere oneni, mgae gae upwani,
Zino kavu mtaleni, mu’nge wajihi puani,
Nimependa niwacheni, nijinomee yaani,
Ya’ani kuficha?

Sifichani ‘mo nenoni, utamuwe ‘so kifani,
Yaani!

Fadhy Mtanga,
Mtongani, Dar es Salaam.
Jumanne, Disemba 3, 2013.

Tuesday, October 1, 2013

Jivute taratibu

Mpenzi sogea ujivute taratibu,
Haya maradhi ya moyo uje kuyatibu,
Njoo unibembeleze ukiwa karibu,
Ewe nikupendaye ulo wangu muhibu,
Jivute taratibu, sogea karibu.

Njoo karibu nikweleze yanonisibu,
Nikueleze ewe ulo wangu tabibu,
Unipozaye yanijiapo masahibu,
Mapenzi unipayo yenye nguvu ajabu,
Jivute taratibu, sogea karibu.

Mpenzi wangu wang'ara kuzidi dhahabu,
Mpenzi wanukia nukato mahabubu,
Tunu nakupatia kwa moyo kuratibu,
Wewe ndo wangu hunacho kifani taibu,
Jivute taratibu, sogea karibu.

Ukiniacha moyo utapata taabu,
Nichanganyikiwe nikose hata adabu,
Nijaze mapenzi tena bila kuhesabu,
Wewe kukuacha katu siwezi jaribu,
Jivute taratibu, sogea karibu.

Mapenzi unipayo tuzo yako thawabu,
Kwako nimezama mapenzini nimeghibu,
Nikikosa nambie sitosita kutubu,
Usininunie mapenzi tukaharibu,
Jivute taratibu, sogea karibu.

Fadhy Mtanga,
Morogoro.
Jumanne, Oktoba 1, 2013.

Thursday, September 12, 2013

Wewe ndo furaha yangu

Wangu moyo laazizi, wewe nimekupatia,
Juu yako sijiwezi, moyo umekuchagua,
Kukupenda s’oni kazi, mwenyewe nimeridhia,
Wewe ndo furaha yangu, wanipa kutabasamu.

Sipigi tena miluzi, nukta nishaitia,
Kutangatanga siwazi, vyote we’ wanipatia,
Kwingine kwenda siwezi, hakuna ‘lokufikia,
Wewe ndo furaha yangu, mapenzi yako matamu.

We ndo wangu usingizi, daima nakuwazia,
Wanijia kwenye njozi, hakuna wa kunambia,
Moyo mejaa mapenzi, wewe nimekujazia,
Wewe ndo furaha yangu, juu yako si’shi hamu.

Siw’ogopi wazengezi, kwako nimeshatulia,
Wengine naw’ona ndezi, moyo umeshachukua,
Hayatoshi maongezi, wewe nikakusifia,
Wewe ndo furaha yangu, wa moyoni muhashamu.

Maisha yana viunzi, penzi kutuharibia,
Nabana zangu pumzi, penzi letu nalindia,
Wengine wana majonzi, kutwona twafurahia,
Wewe ndo furaha yangu, duniani kote humu.

Nayasema wazi wazi, kwako nimeshakolea,
Kwingine sikuangazi, kwako wewe nimetua,
Kukusaliti siwezi, leo ahadi  natoa,

Wewe ndo furaha yangu, ya daima na dawamu.

Fadhy Mtanga,
Sinza Mori, Dar es Salaam.
Alhamisi, Septemba 12, 2013.

Sunday, September 8, 2013

Kama nyota za angani

Kama nyota za angani,
Usiku zinavyong’aa, ndivyo penzi langu kwako,
Mapenzi yamenijaa, huba tele juu yako,
Wala sikati tamaa, mimi ndiye mali yako.

Kama nyota za angani,
Usiku zinavyong’aa, ndivyo ninavyokupenda,
Kwako mefika haswaa, kwingine siwezi kwenda,
Maneno nayakataa, yaso ubani yavunda.

Kama nyota za angani,
Usiku zinavyong’aa, wewe ndo mpenzi wangu,
Bora wakinishangaa, sitoweza peke yangu,
Kamwe sijihisi njaa, uwapo pembeni yangu.

Kama nyota za angani,
Usiku zinavyong’aa, daima nitakuenzi,
Siwezi kukuhadaa, ewe wangu laazizi,

Moyoni ushanikaa, we ndiwe wangu mpenzi.

Fadhy Mtanga,
Kijitonyama, Dar es Salaam.
Jumapili, Septemba 8, 2013.

Monday, August 26, 2013

Yeye yule

Nipo kilimani ninaranda,
Wala singoji Peugeot kupanda,
Ninamngoja ninayempenda,
Moyo wangu alouchukuwa.

Aloniponya changu kidonda,
Alonifanya n'ache kukonda,
Moyo wangu mwenye kuulinda,
Kwayo mahaba ninayopewa.

Mpenzi wangu nayempenda,
Kwa silabi irabu na inda,
Ambaye bilaye swezi enda,
Juu yake ndo nishanogewa.

Kwa dhati ya moyo nampenda,
Wala hakuna wa kumshinda,
Namuwaza kila nakokwenda,
Penzi moyoni limeridhiwa.

Fadhy Mtanga,
Arusha Tanzania,
Jumatatu, Agosti 26, 2013.

Sunday, August 4, 2013

Peleka salamu

Njoo rafiki yangu kalamu,
Uziandike hizi salamu,
Zimfikie wangu muhimu,
Juu yake ninayeugua.

Muda ndo huu umeshatimu,
Nami nazidi pata wazimu,
Hata kula sina tena hamu,
Kwa jinsi ninavyomuwazia.

Usingizi ni mang'amung'amu,
Alfajiri ninajihimu,
Utadhani ndimi mnajimu,
Kumbe yeye namuugulia.

Kalamu zifikishe salamu,
Mwambie ye ndo muhashamu,
Moyoni nimempa sehemu,
Ili yeye apate tulia.

Kamwambie asinidhulumu,
Asinifanye nibwie sumu,
Ndugu wote watamlaumu,
Wanajua ninamzimia.

Kamfanye vema afahamu,
Nimemwandalia penzi tamu,
Ambalo halitomwisha hamu,
Daima atalifurahia.

Saturday, July 13, 2013

Mwendo wetu

Wa jongoo?
Twenda mwendo kusuasua
Tunao,
Walakini!

Twajongea?
Sie zatushinda mbio
Ilhali wenzetu,
Wamekazana!

Mwendo wetu!
Kwani tuna nini siye?
Waloyaweza wenzetu,
Siye yatushinda!

Tuesday, May 28, 2013

Taratibu basi!

kitaka kunipenda nipende taratibu,
Ukizidisha utaniuwa mwenzio!
Ukitaka kunipa raha basi iwe taratibu,
Ukizidisha utaniuwa mwenzio!

Ukitaka kuniumiza niumize tu kidogo,
Ukizidisha utaniuwa mwenzio!
Ukitaka kunitesa sikuzuwii ila taratibu,
Ukizidisha utaniuwa mwenzio!

Moyo wangu, moyo wangu uendee taratibu,
Ukizidisha waniletea masahibu!
Usiku silali ukiniuliza we ndo sababu,
Taratibu basi utaniuwa mwenzio!

Moyo wangu, moyo wangu unauadhibu,
Basi fanya japo taratibu!
Niondolee madhila yaliyozidia hesabu,
Utaniuwa mwana wa mwenzio!

Taratibu, twende taratibu basi taratibu,
Nitese tu kidogo ukipata sababu!
Ukizidisha moyo wangu wauharibu,
Ukizidisha utaniuwa mwenzio!

Tuesday, April 23, 2013

Majibu tunayo

Ila maswali hakuna.

Maswali yaliyopo hayafai,
Wao hawapo tayari,
Kuyajibu.
Majibu hawayajui,
Ni vilaza.

Wawezayo kuyajibu wao,
Ni yale tusowauliza,
Bla bla tu!
Na takwimu,
Na matusi pia,
Mbona wana mambo?
Mamboyo si haba.

Hapa haba,
Pale kibaba,
Halafu wanasema,
Binadamu wote ni sawa
Na Afrika ni moja!
Kumbe,
Je?
Si hivyo.

Hatuna maswali,
Tushajijibu wenyewe,
Akili kumkichwa!

Alaa kumbe!

Thursday, April 18, 2013

Juu yako sina hali

Mwenzio mi sijiwezi,
Siupati usingizi,
Layumba langu jahazi,
Mapenzi yan'elemea.

Naumwa si kikohozi,
Ugonjwa wangu mapenzi,
Tabibu we' laaziz,
Maradhi yanizidia.

Usingizi sikupati,
Moyo wangu hatihati,
Mapenzi yangu ya shari,
Wewe nimekupatia.

Natamani nikupate,
Nikuvishe yangu pete,
Hariri umeremete,
Nayo ahadi kutoa.

Kwako mie naugua,
Moyo wangu we chukua,
Kichwani wanizuzua,
Siachi kukuwazia.

Hakuna chako kifani,
Japo moja hafanani,
Wewe u nambari kwani,
Nami nikakuchagua.

Tafurahi kinipenda,
Vinginevyo nitakonda,
Sitokipona kidonda,
Na sitoacha kulia.

Wednesday, March 13, 2013

Hodi hodi!

Hodi,
Hodi hodi jamani nimerejea,
Mwana mpotevu niliyepotea,
Kwenye upweke nilielea,
Sasa ninarejea.

Hodi,
Hodi jamani nipokeeni,
Niruhusuni niingie ndani,
Msinipige faini japo hamsini,
Sasa nimerejea.