Wednesday, September 26, 2012

Wewe ndiyo sababu

Naamka nimejawa tabasamu,
Na kwacho chakula siishiwi hamu,
Furaha yangu yaushinda wazimu,
Moyo wangu una raha muhashamu,
Wewe ndiyo sababu.

Maishani nimejawa na furaha,
Nilishasahau kuhusu karaha,
Najihisi ni kwenye nyota ya jaha,
Hata mwendo wangu hujawa madaha,
Wewe ndiyo sababu.

Ukiwepo huwa kitamu chakula,
Hata usiku kwa raha ninalala,
Napenda niwe nawe kila mahala,
Moyo 'mekolea mapenzi jumla,
Wewe ndiyo sababu.

Wasopendwa nahisi wana taabu,
Ila sitaki juwa yanowasibu,
Raha yangu ni kuwa nawe muhibu,
Nina raha nimepata utabibu,
Wewe ndiyo sababu.

Kwenye mapenzi mie ninafaidi,
Penzi jekundu lishindalo waridi,
Tena ni tamu lilojawa sudi,
Linifanyalo nisihisi baridi,
Wewe ndiyo sababu.

Sasa ninaijua yake thamani,
Penzi la kweli lisilo na kifani,
Nina raha raha kutoka moyoni,
Nina furaha furaha duniani,
Wewe ndiyo sababu.

Fadhy Mtanga,
Mbeya, Tanzania.
Jumatano, Septemba 26, 2012.

Monday, September 24, 2012

Wewe pekee

Nitakupa bega langu uliegamie,
Nitakupa mdomo wangu usemee,
Nitakupa masikio yangu usikilizie,
Nitakupa miguu yangu utembelee,
Kwa kuwa nakupenda sana.

 Dunia nzima nitaiambia isikie,
Tuzo ya thamani ndiwe uistahilie,
Hatokei mtu yeyote wewe akufikie,
Maishani wacha tu nikufurahie,
Uzuriwo umeshinda kawaida.

 Upo kwangu ya nyuma usiyawazie,
Mungu kanionesha wewe nikuchague,
Yanifanya daima wewe nikufikirie,
Penzi lenye thamani nikugaie,
Maana kwangu umeshatosha.

 Wewe pekee!

 Fadhy Mtanga,
Mbeya, Tanzania.
Jumatatu, Septemba 24, 2012.

Monday, September 3, 2012

Kalamu yangu andika

Nyerere alishasema, fitna na iwe mwiko,
Tuseme kweli daima, pasi fitini wenzako,
Maneno yenye hekima, yandikwe kila andiko,
Kalamu yangu andika, dunia ipate soma.

Andika pasi kuchoka, hata wamwage risasi,
Nenolo lahitajika, andika tena upesi,
Fikisha ‘nakofikika, ‘siwaogope watesi,
Kalamu yangu andika, dunia ipate soma.

Dunia inasubiri, andika basi haraka,
Weleze yalo dhahiri, wanyonge tumeshachoka,
Amani siyo kamari, mfanye mnavyotaka,
Kalamu yangu andika, dunia ipate soma.

Dunia ipate soma, yaandike kwa uwazi,
Wanakuza uhasama, kutuua kama mbuzi,
Hatupo tena salama, hawataki mageuzi,
Kalamu yangu andika, dunia ipate soma.

Dunia yote ijue, nini kinaendelea,
Hatua izichukue, jahazi kuliokoa,
Jamii ijitambue, izidi kujikomboa,
Kalamu yangu andika, dunia ipate soma.

Wino wako unadumu, usomwe vizazi vyote,
Andiko lako muhimu, lidumu milele yote,
Kwa awamu na dawamu, andika tu usisite,
Kalamu yangu andika, dunia ipate soma.

Ipe dunia ukweli, usiogope risasi,
Wao wasostahimili, huishi kwa wasiwasi,
Viongozi baradhuli, wajue yetu fokasi,
Kalamu yangu andika, dunia ipate soma.

Andika uwaeleze, kamwe haturudi nyuma,
Wao wajiendekeze, chakaribia kiyama,
Waache watuchokoze, hatutaki shika tama,
Kalamu yangu andika.

Fadhy Mtanga,
Mbeya Tanzania.
Jumapili, Septemba 2,2012.

Friday, August 31, 2012

Nimeshindwa vumilia

Siwezi siwezi tena, siwezi kuvumilia,
Hali miye tena sina, sinayo menizidia,
Usiku nao mchana, nazidi tu kuumia,
Nimeshindwa vumilia, kutosema nakupenda.

Mejaribu kujikaza, kinywa nikakizuia,
Mezidi moyo umiza, nafuu h’ijatokea,
Moyo pendo mekoleza, mekolea kuzidia,
Nimeshindwa vumilia, kutosema nakupenda.

Mejaribu kutosema, moyo haujatulia,
Juu juu ninahema, kama nataka jifia,
Kwako nilishatuwama, sina ninalosikia,
Nimeshindwa vumilia, kutosema nakupenda.

Usingizi siupati, wewe tu nakuwazia,
Nipo hoi hatihati, hatihati kuugua,
Nawaza kila wakati, ni vipi nitakwambia,
Nimeshindwa vumilia, kutosema nakupenda.

Nimechoka nimechoka, nimechoka vumilia,
Leo nakwita itika, moyo upate kutua,
Maana ushaniteka, na moyo usharidhia,
Nimeshindwa vumilia, kutosema nakupenda.

Nipo hoi taabani, moyo kwako umetua,
Nitakuwa furahani, wewe kinikubalia,
Nimekuweka moyoni, uniweke nawe pia,
Nimeshindwa vumilia, kutosema nakupenda.

Chonde chonde muhashamu, nifanye moyo tulia,
Nikupe pendo adhimu, pekee hii dunia,
Pendo liso na awamu, kila siku lachanua,
Nimeshindwa vumilia, kutosema nakupenda.

Nikupe pendo la huba, pendo nalosisimua,
Pendo tele na si haba, moyoni ‘shakujazia,
Pendo mara saba saba, mahaba yalozidia,
Nimeshindwa vumilia, kutosema nakupenda.

Siwezi tena kungoja, kusubiri kukwambia,
Moyoni ipo haja, zaidi nitajifia,
Nakupenda wewe mmoja, hakuna nokufikia,
Nimeshindwa vumilia, kutosema nakupenda.

Uwe wangu wa milele, name niwe wako pia,
Nikupe mapenzi tele, nawe tayafurahia,
Pamoja huku na kule, kwa raha ilozidia,
Nimeshindwa vumilia, kutosema nakupenda.

Nimeshindwa vumilia, nd’o ma’na nimekwambia,
Kwamba ninakuzimia, juu yako naugua,
Natumai mesikia, kisha tanikubalia,
Kwani siwezi himili, kutosema nakupenda.

Fadhy Mtanga,
Mbeya Tanzania.
Ijumaa, Agosti 31, 2012.

Tuesday, August 28, 2012

Upo wapi usikivu?

Mwasema muwasikivu, ati yetu mwasikia,
Ati muwavumilivu, changamoto ‘kiwajia,
Mbona mwatumia nguvu, ukweli wakiwambia?
Upo wapi usikivu?

Upo wapi usikivu, jamii yataka jua,
Tuonacho ni mabavu, jamii kuitishia,
Kwao wasio na nguvu, nyie ndo mwazitumia,
Upo wapi usikivu?

Upo wapi usikivu, mwaishangaza dunia,
Hamna hoja za nguvu, mnazoweza tumia,
Mioyo yenu mikavu, iso na huruma pia,
Upo wapi usikivu?

Twonesheni usikivu, tumechoka vumilia,
Kwani hatuzili mbivu, dawamu ‘mesubiria,
Twa’mbulia maumivu, ‘nayotusababishia,
Upo wapi usikivu?

Twambieni kavu kavu, twaona mwatuchezea,
Fikira zenu chakavu, bora ngazi kuachia,
Mmeshakuwa masuzu, hata kubweteka pia,
Upo wapi usikivu?

Wacha tuseme ‘laivu’, iwe itakavyokua,
Mungwenu labda ‘shivu’, si huyu ‘nomwabudia,
Mungu wetu msikivu, twamwomba atusikia,
Wapi wenu usikivu?

Mabavu yenu mabavu, mwisho utawafikia,
Si punde siku angavu, Mungu atatupatia,
Mola wetu msikivu, hakika atajalia,
Hatuishiwi imani!

Fadhy Mtanga,
Mbeya Tanzania.
28 Agosti 2012.

Friday, April 27, 2012

Kalamu yangu

Ile iliyopotea, sasa nimeshaipata,
Kule likopotelea, nami nimeitafuta,
Kalamu ‘litokomea, kwa miezi hii sita,
Kalamu yangu, nishaishika.

Sasa naweleza nyote, mlionisubiria,
Kichofanya sinipate, kalamu ‘linikimbia,
Nikasaka kotekote, bado sikuifikia,
Kalamu yangu, nishaishika.

Leo nimeshaishika, nimeipata kalamu,
Kichobaki kuandika, yote ninayofahamu,
Kwandika pasi kuchoka, yote yote mumu humu,
Kalamu yangu, nishaishika.

Hamu mi sikuishiwa, daima nilitamani,
Tungo sikukaukiwa, zilibakia kichwani,
Imekuwa majaliwa, kalamu i kibindoni,
Kalamu yangu, nishaishika.