Tuesday, October 18, 2011

Mwenziyo sinayo khali

Muhashamu muhashamu, ujumbe nakutumia,
Pokea zangu salamu, za mashamshamu pia,
Nimepatwa na wazimu, siachi kukuwazia,
Mwenziyo sinayo khali, sijiwezi juu yako.

Kama mapenzi ni sumu, basi imeniingia,
Nakesha mang’amung’amu, wewe kukufikiria,
Yanienda kasi damu, moyo h’utaki tulia,
Mwenziyo sinayo khali, sijiwezi juu yako.

Moyo ‘ngekuwa na zamu, nawe ningekupatia,
Uzionje zilo humu, zilivyojaa hisia,
Halisi zilizo tamu, wewe nizo kupatia,
Mwenziyo sinayo khali, sijiwezi juu yako.

Naganda kama sanamu, wewe ninakungojea,
Zingali siku zatimu, moyo khali wasemea,
Kwa pendo hili adhimu, wewe tuu kukupea,
Mwenziyo sinayo khali, sijiwezi juu yako.

Wao wanonituhumu, hawawezi nisumbua,
Kukupenda ‘melazimu, vinginevyo naugua,
Ungali yangu naumu, hapa chini yake jua,
Mwenziyo sinayo khali, sijiwezi juu yako.

Penzi lisilo awamu, kusema litapungua,
Penzi daima dawamu, moyo wangu we chukua,
Kukupenda ni swaumu, pendo nal’ombea dua,
Mwenziyo sinayo khali, sijiwezi juu yako.

Sihesabu tarakimu, penzi linavyozidia,
Bali ni mastakimu, hakuna ‘nokufikia,
Hakuna wa kukaimu, nafasi ‘nokupatia,
Mwenziyo sinayo khali, sijiwezi juu yako.

Uzuri wako adimu, wengi wanaulilia,
Wazikoleza fahamu, daima nakuwazia,
Kukupenda ni jukumu, mwingine sitomwachia,
Mwenziyo sinayo khali, sijiwezi juu yako.

Kwako siishiwi hamu, kila siku wazidia,
Mapishi yako matamu, mtu sito’bakishia,
Hakika wewe mwalimu, cheti nakutunukia,
Mwenziyo sinayo khali, sijiwezi juu yako.

Beti kumi zimetimu, wewe nimekwandikia,
Nitapiga hata simu, maneno nikakwambia,
Daima nitajihimu, wimbo nikakuimbia,
Mwenziyo sinayo khali, sijiwezi juu yako.

7 comments:

  1. @ Fadhy....

    Muhashamu muhashamu, ujumbe wako sikia
    Zimeshafika salamu, na mbwembwe ulizotia
    Usikupande wazimu, nguo ukazichukia
    Ingawa hunayo hali, na subira chukulia!

    Mapenzi katu si sumu, ni wengi wangejifia
    Isiwe mang'amung'amu, wa 'pono' ngejilalia
    Sidunde kama 'kandimu', hebu moyo kutulia
    Ingawa hunayo hali, na subira chukulia!

    'Moyo ngekuwa na zamu', 'duru' zima ngemwachia
    Akayaonja matamu, khisi na zako hisia
    Singekuwepo ugumu, moja tungelisikia
    Ingawa hunayo hali, na subira chukulia

    Gandishwa kama sanamu, 'michelini' achilia
    Ni muda haujatimu, sikhofu siku kimbia
    Wewe nae dam-damu, madhali memridhia
    Ingawa hunayo hali, na subira chukulia!

    Wote wanokutuhumu, mbali wapuuzilia
    Midhali yako 'naumu', fofofo kujilalia
    Na kila penye ugumu, RABI tawaepushia
    Ingawa hunayo hali, na subira chukulia!

    Penzi daima dawamu, awali na akhiria
    Penzi lisilo awamu, hagombania raia
    Penzi mithili 'saumu', 'nawaytu' menuwia
    Ingawa hunayo hali, na subira chukulia!

    Hakuna wa kukaimu, nafasi hatarajia
    Si pokezana kwa zamu, kama kwalindwa doria
    Hadhiye ni maalumu, katu wa kuifikia
    Ingawa hunayo hali, na subira chukulia!

    Uzuri wake adimu, si 'mchina' loingia
    Wakukoleza fahamu, kutwa kucha muwazia
    Mpenda lako jukumu, kama 'jezi' mevalia
    Ingawa hunayo hali, na subira chukulia!

    Kwake huishiwi hamu, kila siku 'chapukia'
    Mapishi yake matamu, vidole wajing'atia
    Fika sifu ni mwalimu, na cheti mtunukia
    Ingawa hunayo hali na subira chukulia!

    Liwe penzi la amani, na imani kuzidia
    Isiwe tamu mwanzoni, mwisho chachu haingia
    Lisitoke uwanjani, La siri ndani bakia
    Ingawa hunayo hali, na sibira chukulia

    ReplyDelete
  2. Fadhy!Nina hakika salamu zako zimefika na zimepokelewa kwa furaha ile ya machozi yaani ya furaha. Ila mtani labda ushauri usipata na wazimu na pata usinginzi .Mvumulivu hula mbivu...Hakika watu wana vipaji..Namwonea wivu huyo aloandikiwa shairi..LOL

    Hallyie! nawe u-mshairi mzuri sana nimependa uliovyomjibu mtani wangu Fadhy:-)

    ReplyDelete
  3. @ Yasinta.....

    Yasinta nnashukuru, 'utunzi' nimo jaribu!
    Mapenzi yatamdhuru, 'mtani' wako mjibu
    Sikukuruke kukuru, ende nayo taratibu!
    Sivyo hatokuwa huru, kutwa kucha muadhibu.

    ReplyDelete
  4. @Yasinta, ahsante sana kwa kutochoka kunitembelea na kuyasoma mashairi yangu. usichoke.

    @Hallyie,

    Siku nyingi zimepita, wala sijakwandikia,
    Si kwamba nimekufuta, mambo yalinizidia,
    Hapa ningali natweta, pilika sijatulia,
    Sana ninakushukuru, diwani kutoichoka.

    Hakika nafarijika, daima napokusoma,
    Wajua kuziandika, tungo zizo kaa vema,
    Kipajicho chasifika, kwa wote wenye hekima,
    Karibu pasi kuchoka, tukikuze Kiswahili.

    ReplyDelete
  5. @ Fadhy.....

    Pirika huwa hazishi, kukicha zinazidia
    Nasi hatukuangushi, tumo kurasa pitia
    Nyuma hatukurejeshi, labda uje tukimbia
    Vaa gwanda kama jeshi, fani hadhi zidishia!

    Nami moja nakereka, kutunga ukikawia
    Tungo moja hadi mwaka, nyingine ndipo fatia
    Sivyo fani novyotaka, raha yake chapukia
    Maisha huzuni weka, zote zote changanyia.

    ReplyDelete
  6. @Hallyie...

    Nami ninafurahia, maisha ya changamoto,
    Mambo kuyapigania, na kuushinda msoto,
    Vema naiweka nia, ushairi kwangu wito,
    Sitochoka kuandika, ndiyo yangu burudani.

    ReplyDelete
  7. @ Fadhy.....

    "NAMI NINAFURAHIA, MAISHA YA CHANGAMOTO"
    Basi nyingi tutungia, na khasa zenye mvuto
    Sihamaki kizitia, za 'chawa' na 'viroboto'
    Wapenzi watachangia, mana 'fasihi' nzito.

    "MAMBO KUYAPIGANIA, NA KUUSHINDA MSOTO"
    Khasa ukitia nia, hutouona uzito
    Utawika TANZANIA, Lilongwe hadi Maputo
    Si mzaha ifanyia, fani hawa ya mpito.

    "VEMA NAIWEKA NIA, USHAIRI KWANGU WITO"
    Na wala hukuvamia, dhamiri tangu utoto
    Na MOLA kakujalia, kakwitika wako wito
    Mbali waweza fikia, kama 'Mjomba Mpoto'

    "SITOCHOKA KUANDIKA, NDIO YANGU BURUDANI"
    Tungo moja kiiweka, ndo basi huonekani
    Miezi itakatika, kirudi tena mgeni
    Juwa raha ya kupika, kila kitu kiwe ndani.

    ReplyDelete