Friday, October 28, 2011

Mungu akisema ndiyo

Maisha ni mbio mbio, hayanayo lelemama,
Ujapo uamkio, kujihimu kwa mapema,
Ushike kitafutio, usibaki kulalama,
Mungu akisema ndiyo, hakuna wa kuzuia.

Maisha ni harakati, riziki jitafutia,
Uchakarike ‘usweti’, mahali kupafikia,
Uchungu wa mkuyati, nao ukakuingia,
Mungu akisema ndiyo, hakuna wa kuzuia.

Katika mafanikio, hawakosi maadui,
Wale wafikiriao, kukutenda ubedui,
Wa mapembe masikio, nazo roho za utui,
Mungu akisema ndiyo, hakuna wa kuzuia.

Wa nukhsi nukhsani, mambo kukuharibia,
Wanoumia rohoni, mambo yakikunyokea,
Watemao mate chini, ukishaipita njia,
Mungu akisema ndiyo, hakuna wa kuzuia.

Wenye husuda rohoni, pindi ukifanikiwa,
Wenye kusema pembeni, ati umependelewa,
Daima wanotamani, wewe kuharibikiwa,
Mungu akisema ndiyo, hakuna wa kuzuia.

Wakeshao kwa waganga, kukufanyia mizungu,
Ili uweze boronga, maisha yawe machungu,
Wasochoka kusimanga, kukuwekea kiwingu,
Mungu akisema ndiyo, hakuna wa kuzuia.

Hakuna wa kuzuia, Mungu akishaamua,
Baraka kikujazia, wengine wajisumbua,
Watabaki kuumia, roho zikiwatufua,
Mungu akisema ndiyo, hakuna wa kuzuia.

Milango ‘kikufungia, siache kumwomba Mungu,
Yeye takufungulia, kokote chini ya mbingu,
Kheri atakujazia, hata iwe kwa mafungu,
Mungu akisema ndiyo, hakuna wa kuzuia.

Jifunze sana subira, ila sikose imani,
Omba sana kwa busara, umwombe yeye Manani,
Akwepushie madhara, na roho za wafitini,
Mungu akisema ndiyo, hakuna wa kuzuia.

Visa wakikufanyia, kamwe siwarudhishie,
Mola atakujalia, mabaya akwepushie,
Baya kikusingizia, Mola akusaidie,
Mungu akisema ndiyo, hakuna wa kuzuia.

Watahangaika bure, kama Mungu keshasema,
Vyao ni viherehere, na roho zikiwauma,
Waachie ziwafure, wewe zidi tenda mema,
Mungu akisema ndiyo, hakuna wa kuzuia.

Tayezuia ni nani, Mungu kishakuchagua,
Hawawezi abadani, wakeshe wakiagua,
Mungu siye Athumani, kila mtu amjua,
Mungu akisema ndiyo, hakuna wa kuzuia.

Usije kata tamaa, kisa wenye roho mbaya,
Waufanyao unaa, mambo kuharibikiya,
Wakwombeao balaa, waache waule chuya,
Mungu akisema ndiyo, hakuna wa kuzuia.

Hakuna wa kuzuia, Mungu akisema ndiyo,
Ukweli nimekwambia, kaziyo kujua hayo,
Yalo mema simamia, Mola ndiyo kimbiliyo,
Mungu akisema ndiyo, hakuna wa kuzuia.

4 comments:

  1. Imani kitu cha ajabu!
    Na kwa waaminio MUNGU , MUNGU akisema ndio hiyo ni NDIO!

    Lakini si yasemekana majibu hupata wenye imani tu na ndio maana kuombewa au Kikombe cha sehemuhehemu kule sio tiba ya wote?

    ReplyDelete
  2. Ni kweli kabisa Mtakatifu Simon. Kwa wale waaminiyo kila litendekalo maishani mwao huhusianisha na mkono wa Mungu.

    Ndo maana kuna waliokwenda Loliondo wakapona, na wengine tofauti.

    ReplyDelete
  3. Imani! Bahati nzuri kila mtu ana yake!

    ReplyDelete
  4. @ Fadhy......

    MAISHA NI MBIO MBIO, HAYANAYO LELEMAMA
    Si maji kwa ufyagio, taka nyuma yasukuma
    MOLA akisema ndio, mja katu kweka nyuma
    Kwake KUN-FAYAKUNU, hana wa kumzuwia.

    MAISHA NI HARAKATI, RIZIKI JITAFUTIA
    Haziwindwi kwa manati, kila mtu ngetumia
    Sheti ujipinde ati, vyema uje kutulia
    Kwake KUN-FAYAKUNU, katu wa kumzuwia.

    KATIKA MAFANIKIO, HAWAKOSI MAADUI
    Wakakufanya mwenzao, mwao nyoyoni hujui
    Kumbe mbaya roho zao, hasidi na mabedui
    Kwake KUN-FAYAKUNU, katu wa kumzuwia.

    WA NUKHSI NUKHSANI, MAMBO KUKUHARIBIA
    Ndio hao mashetani, nyoyoni wanoumia
    Hukerekwa kama nini, yako kwendea sawia
    Kwake KUN-FAYAKUNU, katu wa kumzuwia.

    WENYE HUSUDA ROHONI, PINDI UKIFANIKIWA
    Wao lowanyima nani, hilo shindwa lielewa
    Ni mmoja RAHMANI, nochukuwa na kutowa
    Kwake KUN-FAYAKUNU, katu wa kumzuwia.

    WAKESHAO KWA WAGANGA, KUKUFANYIA MIZUNGU
    Hao hao ndio wanga, amini haki ya MUNGU
    Kiwa huna hukunanga, kipata kwao uchungu
    Kwake KUN-FAYAKUNU, katu wa kumzuwia.

    HAKUNA WA KUZUWIA, MUNGU AKISHAAMUA
    Kwake anokujalia, sekunde katu chukua
    Papo hapo latimia, mja hilo lamuua
    Kwake KUN-FAYAKUNU, katu wa kumzuwia.

    MILANGO KIKUFUNGIA, SIACHE KUMWOMBA MUNGU
    Makosa 'kughufiria', kulinda na walimwengu
    Riziki kukujalia, kwa yote saba mafungu
    Kwake KUN-FAYAKUNU, katu wa kumzuwia.

    JIFUNZE SANA SUBIRA, ILA SIKOSE IMANI
    Mbele yake alo bora, nohimili mitihani
    Akaivuta subira, fata nguzo za IMANI
    Kwake KUN-FAYAKUNU, katu wa kumzuwia.

    VISA WAKIKUFANYIA, KAMWE SIWARUDISHIE
    MOLA wako shitakia, katu siwalipizie
    Tulipa kwenye dunia, akhera atwisabie
    Kwake KUN-FAYAKUNU, katu wa kumzuiwa.

    WATAHANGAIKA BURE, KAMA MUNGU KESHASEMA
    Walodhamiri 'yarure', iwapasukie ngoma
    Kama kuku wachakure, sishindane na KARIMA
    Kwake KUN-FAYAKUNU, katu wa kumzuwia.

    TAYEZUIA NI NANI, MUNGU KESHAKUCHAGUWA
    Bure kwenda ugangani, kwanza wote laaniwa
    Pokonyeka abadani, alopewa keshapewa
    Kwake KUN-FAYAKUNU, katu wa kumzuwia.

    USIJE KATA TAMAA, KISA WENYE ROHO MBAYA
    "HAKKI-LILLAHI" kaa, omba MOLA kwitikiya
    Kwepushe zote balaa, kukidhi lodhamiriya
    Kwake KUN-FAYAKUNU, katu wa kumzuwia.

    HAKUNA WA KUZUWIA, MUNGU AKISEMA NDIYO
    Na 'aya' zimetwambia, "KUN-FAYAKUN" hiyo!
    "Kuwa papo latimia", maana yake ndo hiyo.
    Kwake KUN-FAYAKUNU, katu wa kumzuwia.

    Walimwengu hatuwezi, MUUMBA mvurugia
    Hilo twaamini wazi, ni ziro asilimia
    Ingilia zake kazi, ni 'kufuru' twafikia
    Kwake KUN-FAYAKUNU, katu wa kumzuwia.

    ReplyDelete