Saturday, October 29, 2011

Kiburi si maungwana

“Sitaki mimi sitaki”, wakubwa wawaambia,
Mtoto haushikiki, huna unalo sikia,
Na wala huambiliki, ungali hujatulia,
Kiburi si maungwana.

Wauleta ukaidi, wakubwa kuwoneshea,
Kamwe huwezi faidi, wote watakukimbia,
Hata ingefika “Eid”, tabaki kuisikia,
Kiburi si maungwana.

Wakubwa husikilizi, wataka jiamulia,
Jambo hawakuelezi, kiambiwa wachukia,
Wajipa wewe ujuzi, huna usilolijua,
Kiburi si maungwana.

Maneno yako makali, daima wayatumia,
Nywelezo kipilipili, kucha unasimamia,
Hunayo ardhilhali, busara mekuishia,
Kiburi si maungwana.

Dunia rangi rangile, kama hukulitambua,
Dunia mwendo mwendole, takuja kukuumbua,
Dunia cheko chekole, hekima ukiijua,
Kiburi si maungwana.

Kiburi chako kiwache, hata Mungu achukia,
Tabiayo ipekeche, watu kuifurahia,
Mabayayo uyafiche, jalala kuyatupia,
Kiburi si maungwana.

8 comments:

  1. KIBURI SI MAUNGWANA (MKAZO)

    Uwe vipi muungwana, hadhiyo hukushushia
    Jeuri wakakuona, mtaani kuchukia
    'Pesa mbili huna mana', semwa na wapita njia
    Si mali hafumbatia, kiburi si maungwana.

    Kiburi si maungwana, si malezi hakulia
    Jabari ukajiona, hovyo watu fyatukia
    Ukaidi kushindana, wakubwa katu sikia
    Si mali hafumbatia, kiburi si maugwana.

    Kila kitu ujuwaji, midomo kibenulia
    Huku jifanya wa mji, 'cheo' kuking'ang'ania
    Stahamili hungoji, na subira huna pia
    Si mali hafumbatia, kiburi si maungwana.

    Usojuwa inswafu, wala vya kuitumia
    Kalima zako ni chafu, 'lindi' kheri mara mia
    Mithili 'gundu' kharufu, kote mehanikizia
    Si mali hafumbatia, kiburi si maungwana.

    Wala siyo ufakhari, sidhani wakusifia
    Kamwe sio uhodari, tuzo ngekuandalia
    Randiamo wakunyari, mate kikutema pia
    Si mali hafumbatia, kiburi si maungwana.

    Urekebishe mwenendo, mapema hujakawia
    Ujijengee upendo, utu kuuzingatia
    Ukuepuke uvundo, sifa njema kunukia
    Si mali hafumbatia, kiburi si maungwana.

    ReplyDelete
  2. hivi kiburi na ubishi ni sawa? nimewaza tu kwa sauti...

    ReplyDelete
  3. @ Yasinta....

    KIBURI na UBISHI kwa nnavyofaham mie siyo sawa.

    Mfano wa KIBURI, mathalan unapita pahala fulani na unawakuta watu ambao ni wakubwa zako ambao unawafaham kwa njia moja au nyingine, huku unajuwa fika, watu hao wangestahili kusalimiwa au kuwajulia hali kwa namna moja au nyingine. Badala yake ukawapita kimya kimya hali umewaona hivi! Badala yake ukajifanya kama vile huna macho na kuwapita kimya! Sasa hicho ndio naweza kusema ni KIBURI, au mtu anaweza kusema.....fulani ana KIBURI, mana kawapita wakubwa zake pale kama vile hajawaona, mana hata salam tu imemshinda kutowa.

    Kwa mfano unaambiwa miguu ya Kuku haifanani na ya Bata, lakini ukawa umeshikilia na kulazimisha kuwa inafanana, hukubali kushindwa juu ya hilo, il-hali kila mtu anaiyona wazi kuwa kuna tofauti kati ya miguu hiyo, lakini wewe tu peke yako ukawa umeshikilia kuwa haina tofauti yeyote na kudai kuwa inafanana, sasa huo ndio tunaweza kusema ni UBISHI. Mana hutaki kushindwa wakati ukweli upo wazi kabisa!

    ReplyDelete
  4. Hallyie...

    Shukuriya kwa mkazo, ambao umeuweka,
    Hakika metowa funzo, ambalo laeleweka,
    Kiburi ni matatizo, ni vema kukiepuka,
    Kiburi si maungwana.

    ReplyDelete
  5. da Yasinta, nadhani Hallyie amekuondolea utata juu ya Kiburi na Ubishi. nami nimejifunza jambo kubwa hapa.

    Ahsante sana Yasinta.

    Ahsante sana Hallyie.

    ReplyDelete
  6. @ Fadhy.....

    SHUKURIA KWA MKAZO, AMBAO UMEUWEKA
    Nawe pia lako wazo, shairi hilo andika
    Maudhuwi si mchezo, ambayo limetutika
    KIBURI jama si nguzo, siegame taanguka!

    ReplyDelete
  7. @ Yasinta....

    Nawe kadhalika, shukran!

    ReplyDelete