Thursday, August 25, 2011

Sauti yangu

Ninataka kuipaza, ilokaza,
Kotekote kueneza, nacho waza,
Wote muje kusikiza, mkiweza,
Nayoeleza!

Kuna mambo yanikwaza, yanumiza,
Kukimya sitokuweza, tonyamaza,
Silali kucha nawaza, nahasiza,
Wanichagiza!

Niaje yazidi oza, yachakaza,
Vyote vyema wamaliza, wakombeza,
Ni lini watabakiza, wandekeza,
Mauzauza!

Sauti yangu napaza, nakataza,
Mola fimbo wacharaza, tena kaza,
Wajutie wao kwanza, wamaliza,
Wavokombeza!

4 comments:

  1. Sautiyo imesikika, hata ile iliyokaza'
    Kwa hiyo sasa hutoumia sana
    kwani marafiki na wengine wamekusikia
    Ahsante kwa kupaza sauti yako.

    ReplyDelete
  2. @ Fadhy....

    Sautiyo ilokaza, ipaze wakusikie
    Uwazayo yaeleza, hata chembe sibanie
    Vipenuni lojibanza, ujumbe uwafikie
    Ipaze tukusikie!

    Yote yanayo kukwaza, hadharani jinadie
    Sijipe kucha kuwaza, ndani ndani uumie
    Sema wanokuchagiza, 'jalada' wafungulie
    Ipaze tukusikie!

    'Baragumu' lipuliza, pande zote wasikie
    Bayana kuwaeleza, mafumbo usitumie
    Jiamini utaweza, siyo 'nyau' utishie
    Ipaze tukusikie!

    ReplyDelete
  3. Yasinta....

    Sauti imesikika, tena imekufikia,
    Ndo sababu hujachoka, mwingine ukamwambia,
    Naye kwingine peleka, ujumbe lokusudia,
    Sauti imesikika!

    ReplyDelete
  4. Hallyie....

    Sauti ninaikaza, mbali iweze fikia,
    Kwa nguvu ninaipaza, wote wapate sikia,
    Haya nayo waeleza, yaweze kuwaingia,
    Sauti yangu!

    ReplyDelete