Wednesday, July 20, 2011

Usingizi siupati

Usiku mie silali, sina hali,
Mwenziyo sinayo khali, hata sili,
Chakula mwenziyo sili, ni ukweli,
Nakuwaza wewe!

Usingizi siupati, wa manati,
Zito langu blanketi, bati bati,
Nawaza kila wakati, varangati,
Wewe upo mbali!

Bora 'ngekuwa karibu, eeh muhibu,
Yatoke yan'onisibu, masahibu,
Penzi lisiniadhibu, kwa irabu,
Kwako nimefika!

Mwingine mie simwoni, hakya nani,
Watawala mawazoni, na moyoni,
Nikutunze kama mboni, ya thamani,
Uwe furahani!

12 comments:

  1. Kisa nini kujidhili, yupo mbali
    Mpaka ukawa huli, dhofu hali
    Na usingizi hulali, sema kweli!
    Juwa kikosa kauli, kwisha 'dili'

    Walala kiweweseka, kosa njozi
    Huku kule kigeuka, macho wazi
    Yupo mbali metamka, kaza uzi
    Muda wakati kifika, tabarizi!

    Lau ngekuwa karibu, na muhibu
    Penginge ngekusulubu, ukatubu!
    Hubalo ngekuadhibu, si ajabu
    Hebu nenda taratibu, sijilabu.

    Mwengine katu oneka, ila huyo
    Mawazoni katu toka, na kumoyo
    Ja 'mboni' livyomuweka, au siyo?!
    Mathalani kugeuka, vipi hiyo?

    Mwisho lala kikoroma, kuusia
    Shughulizo kijituma, mara mia
    Tunda lako hatochuma, novizia
    Zidi muomba KARIMA. kutunzia!

    ReplyDelete
  2. Hallyie....

    Mawazo yananijaa, ni balaa,
    Hofu inanivagaa, kama njaa,
    Nahofu 'kija kataa, 'tachakaa,
    Ni balaa!

    Namhitaji mpenzi, sijiwezi,
    Asiwe wa kwenye njozi, bali wazi,
    Moyowe niubarizi, 'eje ezi,
    Kama kazi!

    Wenzake awaambie, wasikie,
    Pendole anipatie, lizidie,
    Kwake ye' nijivunie,'furahie,
    Wangu mie!

    ReplyDelete
  3. Mawazo yasikuzonge,fanya yako
    Mpweke usijitenge, sende huko
    Tawiva ule matonge, mlo wako
    Vumilia!

    Zidi muomba MWENYEZI, kwangazia
    Lopata mema malezi, kujalia
    Maishani akuenzi, nawe pia
    Ni subira!

    Muda siku tafikia, omba duwa
    Njozizo zitatimia, kijaliwa
    Vilo vyako tajilia, kwa muruwa!
    Ipo siku!

    Mazuri siyo haraka, yafanyia
    Yataka kushuwarika, fikiria
    Kasi ukikurupuka, meumia!
    Taratibu!

    'Mpewa hapokonyeki', litwambia
    Kama chako kitabaki, kikutia
    Katu hutopata feki, tia nia
    Furahia!

    ReplyDelete
  4. Maneno umeyasema, ya hekima,
    Yan'oujaza mtima, yote mema,
    Ni raha napoyasoma, siku nzima,
    Chenye chema!

    Sihemi na sikohoi, sijijui,
    Na wala sijichukii, si adui,
    Bali moyo ujidai, hui hui,
    Sipumui!

    Mawazoni amenata, ninamwota,
    Mikono naifumbata, ninamwita,
    Chozi aje kunifuta, pata pata,
    Sije pweta!

    ReplyDelete
  5. Huhemi na hukohoi, waishije?
    Na ulipo hujijuwi, wafanyaje
    Si kifo hujazirai, tusemeje?
    Tahadhari!

    Zisiwe za alinacha, nazoota
    Mataani hakuacha, haja juta
    Akautupa m'bacha, kwa unopita
    Tafakari!

    Zidi muomba QAHARI, kuitika
    Mipango iwe mizuri, lonyooka
    Bayana isiwe siri, tualika
    Ni fakhari!

    ReplyDelete
  6. Homa hainishi panda, ninakonda,
    Maana pendo napenda, kama kinda,
    La ubani si kuvunda, ye' ni tunda,
    Tonishinda!

    Usingizi usingizi, wa ajizi,
    Yamenijaa mapenzi, kikohozi,
    Tena sijibaraguzi, nabarizi,
    Kama kazi!

    Na hisia sizichoki, nazikoki,
    Moyo hauelezeki, h'ukwepeki,
    Kwingine tena sitaki, kwa bunduki,
    Kheri nduki!

    ReplyDelete
  7. Kupenda huwa maradhi, kifurutu
    Ukawa mwenye kuridhi, kila kitu
    Sema yanayokuudhi, huthubutu
    Ushapenda!

    Mapenzi yamekujaa, hujiwezi
    Mpofu umepumbaa, kama chizi
    Kesha macho umeng'aa, kweli kazi!
    Ndo kupenda!

    Kweli mapenzi upofu, kichunguza
    Khasa ndo kwanza 'alifu', noyaanza
    Mpaka yakija kifu, keshaoza!
    Shughuli!

    Hisia sikupumbaze, sije feli
    Chochoroni sijibanze, mkabili
    Nokudhili mueleze, mpe kweli
    Jiamini!

    ReplyDelete
  8. Kupenda ndiyo ugonjwa, wa moyoni,
    Kwingine waweza punjwa, si penzini,
    Wengine hata wachinjwa, duniani,
    Naamini!

    Kupenda huleta raha, ukipendwa,
    Tena h'ongeza furaha, moyo kendwa,
    Lakini kuna karaha, ukitendwa,
    Pondwa pondwa!

    Mapenzi yanaadhibu, makusudi,
    Mtu akikughilibu, ukaidi,
    Hayafai mwenye gubu, kedi kedi,
    Si mweledi!

    Si vema nikawa moja, bora 'wili,
    Siachi kujikongoja, 'tawasili,
    Kungoja ngoja si hoja, kwa akili,
    Tawasali!

    ReplyDelete
  9. Nakuombea salama, awali na akhiria
    Wendako usijekwama, RABI akwangaze njia
    Ni hayo leo nasema, mengi ushamalizia
    Fursa watoyasoma, pengine nao changia.

    ReplyDelete
  10. Hallyie....

    Niyaseme yepi tena, kuonesha shukurani,
    Hakika wewe mwungwana, kakuj'alia Manani,
    Wewe mkali wa vina, pamoja nazo mizani,
    Karibu tena na tena, hapa kwangu jamvini.

    Hakika tuna jukumu, kukikuza Kiswahili,
    Ni lugha yetu adhimu, tuifanye 'fike mbali,
    Utambulisho muhimu, tena ni wenye amali,
    Karibu tena na tena, hapa kwangu jamvini.

    ReplyDelete
  11. Jamvini mekaribia, na kitako nshakaa
    Na ubani ushatia, naitikia 'duwaa'
    Abadani pakimbia, kiwa penye manufaa
    Ila tungo kazania, sio moja mwezi kaa!

    Umenifanya nirudi, moja ombi taka nena
    Kuvutia huna budi, diwaniyo ikafana
    Tungo nyingi jitahidi, mwaga wapenzi ziona
    Hii kichangia 'Iddi', ile changia 'Haruna'

    Ndio raha ya ulumbi, hasa wengi kikutana
    Pakatimka kivumbi, mithili tapapurana
    Ndipo la utunzi wimbi, 'kidau' kikakazana
    Hilo ndilo langu ombi, umuhimu kiliona!

    Nimalize wasalamu, 'alifu' sianzi tena
    Ingawa sijakhitimu, 'kudodosa' takazana
    Kurudi kinilazimu, kwa hili utaniona.
    Nakuombea WADUDI, azma yako kufana.

    ReplyDelete
  12. Hallyie.....

    Hakika nimefurahi, kuona 'merudi tena,
    Tungo zi stafutahi, zingali tele zafana,
    N'amkapo usubuhi, ninawaza kwacho kina,
    Ndiicho chakula changu.

    Sitokuwa nacho choyo, tungo zibaki kichwani,
    Daima niandikayo, yatoka mwangu moyoni,
    Ili yale usomayo, yakuweke furahani,
    Kiiwe chakula chako.

    ReplyDelete