Sunday, July 10, 2011

Yangu kalamu

Nimeshikwa na wazimu, jambo gumu,
Nahitaji kufahamu, mumu humu,
Ni nani nimtuhumu, ana sumu,
I wapi yangu kalamu?

Kitambo sijaandika, kwa hakika,
Kalamu wapi 'meweka, 'taka saka,
Ama ilikwishachoka, takataka,
I wapi yangu kalamu?

Njoo wewe nikwulize, nieleze,
Ilipo nielekeze, 'sin'cheze,
Jambo nataka juze, wasi'kize,
I wapi yangu kalamu?

Isake kwa'yo busara, si hasira,
Visiwani ama Bara, wastara,
Nataka ile imara, ilo bora,
I wapi yangu kalamu?

Iletwe kalamu hima, n'weze sema,
Ifike hapa mapema, 'sije goma,
Sitaki kupata homa, hujasoma,
I wapi yangu kalamu?

5 comments:

  1. Kalamu uliitupa,
    Kadhan' metupa chupa
    Sasa ndo akili imekupa
    Kukumbuka kalamu ulotupa!

    Nenda pale jalalani
    Karibu na pale njiani
    Fukua mle pipani
    Chukua kalamuyo kiganjani!

    ReplyDelete
  2. Nilisoma kichwa cha habari haraka haraka nikifikiri umeandika Yanga Kalamu, nikajiuliza kulikoni, kusoma shairi alaaaaa

    ReplyDelete
  3. Kwa mie wangu uono, sitoapa
    Pengine liisha wino, haitupa
    Au ishiwa maneno, ukakwepa
    Fikiri lipoiweka, kalamuyo!

    ReplyDelete
  4. Naminajiuliza kalamu ya Fadhy Iwapi?

    ReplyDelete
  5. Huna wa kumtuhumu, kati yetu
    Mwenyewe ujilaumu, kila kitu
    La kudhani kuna sumu, sithubutu
    Ilipo yako kalamu, juwa weye!

    Pengine likwisha choka, kuandika
    Hovyo pengine iweka, ikafoka
    Au winowe kauka, wazi weka!
    Ilipo yako kalamu, juwa weye!

    Huna wa kumuuliza, chakarika!
    Mwenyewe unoitunza, uhakika
    Limorandia angaza, kuponyoka
    Ilipo yako kalamu, juwa weye!

    Kwa visiwani na bara, tasumbuka
    Ni kiwango na ubora, vya kushika
    Juwa wake uimara, 'pepa' weka
    Ilipo yako kalamu, juwa weye!

    Himiza letwe kalamu, na haraka
    Sijetunyima utamu,loyasuka
    Kuombea kwa 'RAHIMU', taoneka
    Ilipo yako kalamu, juwa weye!

    ReplyDelete