Thursday, July 28, 2011

Mimi kwako nimetuwa

Ndege daima hutua, kwenye mti apendao,
Ndege hatojisumbua, mti auchukiao,
Ndege yeye huchagua, mmea autakao,
Mimi kwako nimetuwa.

Nimeruka miti yote, nimetuwa kwako wewe,
Nipe moyo wako wote, ili kwangu uchanuwe,
Raha kamili nipate, nisiende kwinginewe,
Mimi kwako nimetuwa.

Kwako wewe nimetuwa, mi’ sijamwona mwingine,
Wewe nimekuchaguwa, nahitaji tupendane,
Moyo wangu nautowa, siupeleki kwingine,
Mimi kwako nimetuwa.

Kutuwa nimeridhika, nimeamua mwenyewe,
Ninasema kwa hakika, napenda unielewe,
Mimi kwako nimefika, sifikiri kwinginewe,
Mimi kwako nimetuwa.

Kwako wewe sina shaka, moyo umenituwama,
Namwomba wetu Rabuka, atujalie salama,
Tufurahi na kucheka, pote panapo uzima,
Mimi kwako nimetuwa.

Nawe pia usihofu, kwani u chaguo langu,
Nikupende maradufu, wewe u sehemu yangu,
Naahidi hutokifu, kwenye huu ulimwengu,
Mimi kwako nimetuwa.

Wazia kuhusu mimi, ukihitaji furaha,
Lilo langu sikunyimi, nitakupa lilo weha,
Makumi kwayo makumi, daima uwe na raha,
Mimi kwako nimetuwa.

Mimi nd’o unieleze, yale yanaokusibu,
Kwa upendo nisikize, nitowe yalo majibu,
Njia nikuelekeze, we’ ulo wangu muhibu,
Mimi kwako nimetuwa.

Mimi ndiye ndege wako, kwako nimekwisha tuwa,
Kokote kule twendako, tupendane tavyokuwa,
Tuzishinde chokochoko, zao wanojisumbuwa,
Mimi kwako nimetuwa.

8 comments:

  1. Ndege kafuma kiota, taamaki keshatuwa
    Humo katu hatojuta, kashindwa kujitambuwa
    Haruki kasema hata, nje hendi kudonowa
    Ndege hapo keshatuwa!

    Si Kunguru si Kasuku, hao msije elewa
    Huyu si mfano Kuku, jaani kutwa 'chakuwa'
    Simithilishi Chiriku, kaa kimya asojuwa
    Ndege hapo keshatuwa!

    Ndege mti kupata, kama vile alojuwa!
    Si urimbo akanata, vicheko ingelikuwa
    Anga zote kazipita, madhila keshapumuwa
    Ndege hapo keshatuwa!

    Sasa tena hategeki, msije kujisumbuwa
    Kwa 'manati' hapigiki, katu weza mtunguwa
    Kuruka tena hataki, kama 'kinda' alelewa
    Ndege hapo keshatuwa!

    ReplyDelete
  2. Hallyie....

    Ndege kiota ninacho, moyo umekwisha tuwa,
    Kiota nikipendacho, sina la kunisumbuwa,
    Chema changu chambilecho, sinalo la kuuguwa,
    Ndege hapa nishatuwa!

    Kuruka tena sitaki, kama kinda nalelewa,
    Kujivuna nina haki, maana ninanogewa,
    Furaha ninailaki, ni raha ninapatiwa,
    Ndege hapa nishatuwa!

    ReplyDelete
  3. Endeleeni endeleeeni !

    Hallyie upo?

    ReplyDelete
  4. @ Simon....

    Nipo nimejaa tele, pishi imesingiziwa
    Burudika hili lile, kurasani linotiwa
    Karibishwa vile vile, 'bukheri' utapokewa
    Ndo tumo kuendelea!

    ReplyDelete
  5. @ Fadhy...

    Ndege powa kiotani, ruka kwa kuruhusiwa
    Kama kinda mdomoni, chakula kutafuniwa
    Kinywa katu ona 'soni', kwa mapana kifunuwa
    Kija toweka tunduni, ndege ushajiumbuwa!

    Ndege hadhari vipanga, chochote wanonyakuwa
    Tamba kwenye yako anga, tawi hili lile tuwa
    Huna cha kumanga manga, punje zote mejaziwa
    Leo donowa mpunga, kesho 'uwele' mwagiwa.

    Ndege katu si Kunguru, sofugika noambiwa
    Anoliya 'kwaru-kwaru', sochaguwa pa kutuwa
    Sojuwa kinomdhuru, kumoja asochaguwa
    Ndege jisikie huru, 'kiota' mesabiliwa!

    Ndege mbawa sitanuwe, manyoya hapururuwa
    Kiota chako mwenyewe, vyovyote jifaraguwa
    Humo 'makinda' utowe, sivyo chinjwa nyama liwa
    'tundulo' walibomolewe, 'khalas' ikaja kuwa.

    ReplyDelete
  6. Mtakatifu Simon...

    Kuandika twendelea, nawe furahi moyoni,
    Hujaacha tembelea, tena kutoka zamani,
    Tungo twazokuletea, ni vile twawathamini,
    Nasi tunaendelea!

    Kutusoma usichoke, asubuhi na jioni,
    Watufanya tuandike, tuandike kwa makini,
    Kiswahili kisikike, kote kote duniani,
    Nasi tunaendelea!

    ReplyDelete
  7. Hallyie…

    Ndege miye si kunguru, sinayo damu chachuwa,
    Miye ninao uhuru, uhuru usochezewa,
    Sifanyi nikakufuru, kesho ‘shindwe aminiwa,
    Ndege najiona huru, kiota ‘mesabiliwa!

    Ndege sinayo makuu, japo ‘pepo napepewa,
    Daima ningali juu, vyote vyote hudumiwa,
    Na wala sinayo fluu, ingawa ninatibiwa,
    Ndege nabakia juu, raha zote napatiwa!

    Ndege sishindi na njaa, milo yote napikiwa,
    Ni raha kila wasaa, hadi gere naonewa,
    Mahaba tele kujaa, hadi miye kunogewa,
    Nafurahi kila saa, kwani nimebarikiwa!

    ReplyDelete
  8. Sina tena la nyongeza, isije kuwa balaa
    Tosha nilivyomweleza, sifa sije muhadaa
    Ndege hebu jituliza, kiotani limokaa
    Kunguru kimuigiza, utakosa pa kukaa!

    ReplyDelete