Saturday, July 16, 2011

Kalamu inaandika

Dada kamwambie kaka, awe na amani,
Wote walohuzunika, kuwa s'onekani,
Kalamu ilotoweka, ipo kibindoni,
Sasa mchakamchaka.

Kalamu inaandika, winowe pomoni,
Usome pasi kuchoka, 'furahi moyoni,
Upate kuelimika, ma'rifa kichwani,
Sote tukijumuika.

Kiswahili chasifika, hata uzunguni,
Na tena kimeshafika, Sudani Kusini,
Lugha 'staarabika, ya watu makini,
Wan'oheshimika.

Karibuni watukuka, sana karibuni,
Sote tukaburudika, tungo kinyumbani,
Karibuni pasi 'choka, hapa jamvini,
Pamoja tukatunguka.

Kalamu haitochoka, 'subuhi jioni,
Labda 'tapotoweka, humu duniani,
Nisiweze kuandika, nimelala chini,
Ila mtahuzunika.

5 comments:

  1. Afadhali meipata, likuwa kitahanani
    Mana kamata kamata, watu hatuelewani
    Na mguu ukakata, 'peni' haiyonekani
    Sasa mchaka mchaka, sijeshindiwa njiani!

    Kalamu sasa charaza, wino ndo upo pomoni
    Ustawishe baraza, ipate jaa wageni
    Vijiweni lojibanza, wote waje maskani
    Raha ya ngoma kucheza, tujimwae uwanjani.

    Lugha ya letu Taifa, kiswahili namba 'wani'
    Duniani ina sifa, sambaa ulimwenguni
    'Baraatu' kuja kufa, ndio kwanza kileleni
    Kiwekwa kimataifa, wabongo mbona mewini!

    'Hewallah' mekaribia, twajisikia nyumbani
    Kutunga tojisikia, wanopenda wataghani
    Za maoni tachangia, na pole zenye huzuni
    Kwa huba wanoumia, ndo hapa maliwazoni.

    'Insha Allah' omba 'Rabuka', mmoja wetu 'Manani'
    Kalamuyo kuandika, sijegomea njiani
    Sikhofu ukitoweka, na siye tupo njiani
    Salama 'Mola' tuweka, sijeingia huzuni.

    Wasalamu nimefika, nasimama kituoni
    Machache nloandika, lipokosa samahani
    Mja sijakamilika, ni mmoja 'Rahmani'
    Kurasa kichangamka, sitojikhini pembeni.

    ReplyDelete
  2. Hallyie....
    Yote umeshayasema,
    Maneno yenye hekima,
    Nami nimekusikia.

    Sitorudia waama,
    Ushairi kuuzima,
    Kimya kujikalia.

    Wale wanopenda soma,
    Ni hapa ndipo kisima,
    Tungo kuzifurahia.

    ReplyDelete
  3. Zimwage za malumbano
    Malenga wamwage wino
    Baraza takuwa nono
    Ndipo tazidi vutia.

    Sisahau za mafumbo
    Za mambo na vijimambo
    Hapo hutokwenda kombo
    Wengi waweza hamia.

    Kadhalika maliwazo
    Na pia za muongozo
    Zilizojaa mavunzo
    Ndizo khasa tarajia.

    ReplyDelete
  4. Hallyie.....

    Kwa hakika wanikosha,
    Hapa leo nitakesha,
    Tungo tele kuzishusha,
    Maana zinavutia.

    Hakika wewe mjuzi,
    Tena wewe mkufunzi,
    Kwako mimi mwanafunzi,
    Ujuzi najichotea.

    Kiswahili ni kitamu,
    Wala hainihishi hamu,
    Tungo zanipa wazimu,
    Ka' maradhi naugua.

    Nayaugua maradhi,
    Ila moyoni ni radhi,
    Kuzikosa sitaradhi,
    Heri kulala na njaa.

    Utunzi maisha yangu,
    Namshukuru sana Mungu,
    Nawashukuru na wenzangu,
    Ambao hufurahia.

    Kiswahili tukikuze,
    Kote tukakieneze,
    Kwa tungo tuwaeleze,
    Lugha ya kujivunia.

    Nawe karibu 'sichoke,
    Tungo bora tuandike,
    Vizazi zikatunzike,
    Wapate zisimulia.

    ReplyDelete
  5. Fadhy....

    Kadhalika sitochoka
    Kalamu yangu kushika
    'Kidau' wino meweka
    Tungozo zisubiria.

    Nilipo ni 'mwanagenzi'
    Vamia hili jahazi
    Sijuwi kupiga mbizi
    'Andanenga' mfikia.

    Kiswahili yetu lugha
    Khasa kwa wanokijuwa
    Lahaja kizichambuwa
    Hamuye katu kwishia!

    Weza uguwa maradhi
    Kunogewa na lafudhi
    Kina ya peke mahadhi
    Kwa tungo kikitumia.

    'Kipaji' utunzi kwangu
    Nitunuku MOLA wangu
    Hushughulika na yangu
    Tunga nikijisikia.

    Umenipa changamoto
    U-mwepesi si mzito
    Ziponda kama kokoto
    Betizo watushushia.

    Asante nikaribisha
    Nawe morali zidisha
    Tungo nyingi zichapisha
    Jamii kuwafikia.

    ReplyDelete