Saturday, November 12, 2011

Mbeya twataka amani

Mola nipe ujasiri, leo niyaseme wazi,
Ninene yalo dhahiri, masikio yayajazi,
Siitaki iwe siri, sitaki kigugumizi,
Mbeya twataka amani, asotaka aondoke.

Mbeya twataka amani, tumechoka kuonewa,
Mwatuweka kundi gani, la mchwa ama la chawa?
Mmeuguwa vichwani, pengine mpewe dawa,
Mbeya twataka amani, asotaka aondoke.

Asotaka aondoke, Mbeya akatuachia,
Situfanye tuta’bike, mabavu kuyatumia,
Aondoke ende zake, mji uweze tulia,
Mbeya twataka amani, asotaka aondoke.

Mbeya mahali pazuri, wachache wapaharibu,
Vichwani hawafikiri, huongozwa na gadhabu,
Hudhani umashuhuri, jamii kuiadhibu,
Mbeya twataka amani, asotaka aondoke.

Dada kamwambie kaka, avifungashe virago,
Kaseme tumeshachoka, atuondolee zogo,
Amani in’otoweka, aibebee mpago,
Mbeya twataka amani, asotaka aondoke.

Aondoke ende zake, asirudi tena Mbeya,
Kamwe tusimkumbuke, kwa huo wake ubaya,
Sana asahaulike, fikiraze zilopwaya,
Mbeya twataka amani, asotaka aondoke.

Pamoja tushikamane, kuitetea amani,
Kamwe tusivurugane, wabaya wapigwe chini,
Sisi sote tuungane, kuondoa wafitini,
Mbeya twataka amani, asotaka aondoke.

Tuijenge Mbeya yetu, ili izidi kung’aa,
Ili wale waso utu, wabaki kuishangaa,
Na tusikubali katu, Mbeya yetu iwe jaa,
Mbeya twataka amani, asotaka aondoke.

Chonde chonde waungwana, maneno myasikie,
Ubabe wenu hapana, kwingine mkafanyie,
Kwetu hamna maana, si wagomvi watu sie,
Mbeya twataka amani, asotaka aondoke.

Aende afanye hima, atuwekea usiku,
Atwache sisi salama, kwani sisi siyo kuku,
Aende zake mapema, tutamtoa mkuku,
Mbeya twataka amani, asotaka aondoke.

Thursday, November 10, 2011

Mganga wewe mwenyewe

Wa’ngaika kila siku, ukiwasaka waganga,
Waenda kule na huku, umefika hata Tanga,
Mepeleka hadi kuku, ‘lipokwenda Sumbawanga,
Mganga wewe mwenyewe, kunusuru ndoa yako.

Tajihangaisha bure, kudhani wanakuroga,
Mume usimpapure, ukadhani yeye boga,
Mume simcheze shere, kwayo mambo ya kuiga,
Mganga wewe mwenyewe, kunusuru ndoa yako.

Mume usipomtii, lazima atakuchoka,
Kama wewe husikii, ndoa itaharibika,
Na ndoa haikawii, vivi hivi kuvunjika,
Mganga wewe mwenyewe, kunusuru ndoa yako.

Chunga mwenendo wako, uone kama wafaa,
Wacha kufanya vituko, ndoa itakuchakaa,
Sikudanganye wenzako, kwani dunia hadaa,
Mganga wewe mwenyewe, kunusuru ndoa yako.

Mpe mumeo heshima, naye atakuthamini,
Mwambie kwayo hekima, yaliyo mwako moyoni,
Kubali akikutuma, uwache umajinuni,
Mganga wewe mwenyewe, kunusuru ndoa yako.

Usiufate mkumbo, sijaribu asilani,
Yatakuchachia mambo, wenza wacheke pembeni,
Ndoa hainazo tambo, bali busara kichwani,
Mganga wewe mwenyewe, kunusuru ndoa yako.

Mwanamke mpumbavu, hubomoa nyumba yake,
Na mwanamke mvivu, hajui wajibu wake,
Tena hawi msikivu, labda siku atake,
Mganga wewe mwenyewe, kunusuru ndoa yako.

Watu wakikukosoa, ni vema uwaelewe,
Ndoa kiitia doa, talia wewe mwenyewe,
Wengine wataopoa, kutunza usaidiwe,
Mganga wewe mwenyewe, kunusuru ndoa yako.

Tuesday, November 1, 2011

Leo ni leo

Kesho kesho ya manyani, wangali hawajajenga,
Ilitokea zamani, nyani nao wakapanga,
Wataka wakae ndani, waache kutangatanga,
Wakaiweka yamini, sasa kipigwe kipenga.

Mwingine kakosekana, wakabaki jiuliza,
Akawasili mchana, kisa akawaeleza,
Mtoto kaugua sana, ikabidi kumwuguza,
“Kesho kwa mapema sana, jambo tutatekeleza”.

Kesho ilipofikia, manyani wakajihimu,
Mwenzao hajatokea, ikawajaza wazimu,
Walipomuulizia, mtotowe kanywa sumu,
Nyani wakajiambia, “basi kesho tulazimu”.

Na kesho kulipokucha, mwenzao haonekani,
Wakadhani kawakacha, kemua nenda mitini,
Mwenzao hakujificha, kewa’leza kulikoni,
Amejikwaa ukucha, damu yatoka doleni.

Nyani sasa wakasema, “hebu tusikilizane”,
Kesho yaenda mrama, na mambo yashindikane,
Tuitumie hekima, mambo haya tupangane,
Mwingine akalalama, vema tusubiriane.

Basi hadi leo hii, nyani wasubiri kesho,
Kesho haiwafikii, pengine yao ‘spesho’,
Sasa hawafikirii, weshaona ni michosho,
Pori hawalikimbii, huko sasa kwao mwisho.

Leo ni leo sikia, asemaye kesho mwongo,
Leo leo ngetumia, kuuchekecha ubongo,
Sipende kusubiria, kesho ufanye mipango,
Kesho haitofikia, hata ngetegea ‘mingle’.

Usiwe kama manyani, hukosi visingizio,
Ziweke vema ‘plan’, yanowezekana leo,
Chekecha vema kichwani, kabla yake machweo,
Tena singoje jioni, muda huu egemeo.

Leo iwe yako ada, kesho siisubirie,
Utumie vema muda, kesho ukusaidie,
Kesho ngeipaka poda, bado situmainie,
Leo hainayo shida, siku yako itumie.

Sunday, October 30, 2011

Niheshimu nikweshimu

Fanya nawe nitendee, unalopenda tendewa,
Maneno unisemee, unayopenda semewa,
Ikibidi nichekee, kama wapenda chekewa,
Niheshimu nikweshimu, unipende nikupende.

Jambo usilolitaka, nami usinifanyie,
Uniombee baraka, visa usinitilie,
Usiwe wa kuropoka, bali mema unambie,
Niheshimu nikweshimu, unipende nikupende.

Usiwe wa kulalama, jambo usipofanyiwa,
Bali uchunguwe vema, kama huwa wajitowa,
Kiasi unachopima, ndicho hicho tapimiwa,
Niheshimu nikweshimu, unipende nikupende.

Ukitaka sikilizwa, wengine wasikilize,
Ili kama ni kutuzwa, nawe wengine watuze,
Vinginevyo utalizwa, na watu wakuzeveze,
Niheshimu nikweshimu, unipende nikupende.

Cha kwangu ukikitaka, isiwe chako waficha,
Kwangu ukila nafaka, kwako sinilishe kucha,
Nikikupa vya kuoka, nigee japo mchicha,
Niheshimu nikweshimu, unipende nikupende.

Wepesi wa kupokea, uwe na kwenye kutoa,
Kitu mtu kikugea, wewe sibaki kodoa,
Nawe kimpelekea, upamoja hutopoa,
Niheshimu nikweshimu, unipende nikupende.

Heshima ninayokupa, nawe uitoe pia,
Siyo wewe unakwepa, huku yangu watakia,
Sinifanye kukwogopa, daima kunitishia,
Niheshimu nikweshimu, unipende nikupende.

Saturday, October 29, 2011

Kiburi si maungwana

“Sitaki mimi sitaki”, wakubwa wawaambia,
Mtoto haushikiki, huna unalo sikia,
Na wala huambiliki, ungali hujatulia,
Kiburi si maungwana.

Wauleta ukaidi, wakubwa kuwoneshea,
Kamwe huwezi faidi, wote watakukimbia,
Hata ingefika “Eid”, tabaki kuisikia,
Kiburi si maungwana.

Wakubwa husikilizi, wataka jiamulia,
Jambo hawakuelezi, kiambiwa wachukia,
Wajipa wewe ujuzi, huna usilolijua,
Kiburi si maungwana.

Maneno yako makali, daima wayatumia,
Nywelezo kipilipili, kucha unasimamia,
Hunayo ardhilhali, busara mekuishia,
Kiburi si maungwana.

Dunia rangi rangile, kama hukulitambua,
Dunia mwendo mwendole, takuja kukuumbua,
Dunia cheko chekole, hekima ukiijua,
Kiburi si maungwana.

Kiburi chako kiwache, hata Mungu achukia,
Tabiayo ipekeche, watu kuifurahia,
Mabayayo uyafiche, jalala kuyatupia,
Kiburi si maungwana.

Friday, October 28, 2011

Mungu akisema ndiyo

Maisha ni mbio mbio, hayanayo lelemama,
Ujapo uamkio, kujihimu kwa mapema,
Ushike kitafutio, usibaki kulalama,
Mungu akisema ndiyo, hakuna wa kuzuia.

Maisha ni harakati, riziki jitafutia,
Uchakarike ‘usweti’, mahali kupafikia,
Uchungu wa mkuyati, nao ukakuingia,
Mungu akisema ndiyo, hakuna wa kuzuia.

Katika mafanikio, hawakosi maadui,
Wale wafikiriao, kukutenda ubedui,
Wa mapembe masikio, nazo roho za utui,
Mungu akisema ndiyo, hakuna wa kuzuia.

Wa nukhsi nukhsani, mambo kukuharibia,
Wanoumia rohoni, mambo yakikunyokea,
Watemao mate chini, ukishaipita njia,
Mungu akisema ndiyo, hakuna wa kuzuia.

Wenye husuda rohoni, pindi ukifanikiwa,
Wenye kusema pembeni, ati umependelewa,
Daima wanotamani, wewe kuharibikiwa,
Mungu akisema ndiyo, hakuna wa kuzuia.

Wakeshao kwa waganga, kukufanyia mizungu,
Ili uweze boronga, maisha yawe machungu,
Wasochoka kusimanga, kukuwekea kiwingu,
Mungu akisema ndiyo, hakuna wa kuzuia.

Hakuna wa kuzuia, Mungu akishaamua,
Baraka kikujazia, wengine wajisumbua,
Watabaki kuumia, roho zikiwatufua,
Mungu akisema ndiyo, hakuna wa kuzuia.

Milango ‘kikufungia, siache kumwomba Mungu,
Yeye takufungulia, kokote chini ya mbingu,
Kheri atakujazia, hata iwe kwa mafungu,
Mungu akisema ndiyo, hakuna wa kuzuia.

Jifunze sana subira, ila sikose imani,
Omba sana kwa busara, umwombe yeye Manani,
Akwepushie madhara, na roho za wafitini,
Mungu akisema ndiyo, hakuna wa kuzuia.

Visa wakikufanyia, kamwe siwarudhishie,
Mola atakujalia, mabaya akwepushie,
Baya kikusingizia, Mola akusaidie,
Mungu akisema ndiyo, hakuna wa kuzuia.

Watahangaika bure, kama Mungu keshasema,
Vyao ni viherehere, na roho zikiwauma,
Waachie ziwafure, wewe zidi tenda mema,
Mungu akisema ndiyo, hakuna wa kuzuia.

Tayezuia ni nani, Mungu kishakuchagua,
Hawawezi abadani, wakeshe wakiagua,
Mungu siye Athumani, kila mtu amjua,
Mungu akisema ndiyo, hakuna wa kuzuia.

Usije kata tamaa, kisa wenye roho mbaya,
Waufanyao unaa, mambo kuharibikiya,
Wakwombeao balaa, waache waule chuya,
Mungu akisema ndiyo, hakuna wa kuzuia.

Hakuna wa kuzuia, Mungu akisema ndiyo,
Ukweli nimekwambia, kaziyo kujua hayo,
Yalo mema simamia, Mola ndiyo kimbiliyo,
Mungu akisema ndiyo, hakuna wa kuzuia.

Thursday, October 27, 2011

Ukipenda boga

Pendo pendo mwapendana, nyie ni nyie wawili,
Pendo pendo mwashibana, lenu la jambo muhali,
Mwanoga mwaambiana, mwingine hatobadili,
Basi ukipenda boga, lipende na ua lake.

Mapenzi yake matamu, wanogewa na mumeo,
Kamwe haiishi hamu, ana upya kila leo,
Penzi lashika hatamu, huwajali visemeo,
Basi ukipenda boga, lipende na ua lake.

Mumeo umemkuta, anao na ndugu zake,
Binti unafurukuta, hutaki kwako wafike,
Wataka mume kufyata, lako tu nd’o alishike,
Basi ukipenda boga, lipende na ua lake.

Siyo vema mwanakwetu, si tabia yenye sudi,
Nao waoneshe utu, upendo kwao si budi,
Mabezo si malikitu, siwoneshe ukaidi,
Basi ukipenda boga, lipende na ua lake.

Kwa mumeo umekuta, tayari alishazaa,
Kabla hajakupata, akupe wake wasaa,
Mtoto wamkorota, zaidi wamkataa,
Basi ukipenda boga, lipende na ua lake.

Nawe umepata mke, tayari ana mtoto,
Simfanye ateseke, kuiweka nyumba joto,
Haki yake apendeke, siyo kuleta fukuto,
Basi ukipenda boga, lipende na ua lake.

Usipende nusu nusu, nani tena wamwachia,
Yake yote yakuhusu, nayo uyapende pia,
Sisite kumruhusu, nduguze kutembelea,
Basi ukipenda boga, lipende na ua lake.

Mapenzi huleta raha, kwa dhati mkipendana,
Tena huipata siha, kama mwasikilizana,
Siyafanyie mzaha, mkaja kuumizana,
Basi ukipenda boga, lipende na ua lake.

Cha mwenziyo kyone chako, halafu ukithamini,
Kipende moyoni mwako, sikitenge asilani,
Sikifanyie vituko, kamwe kamwe abadani,
Basi ukipenda boga, lipende na ua lake.

Ya kusema nimesema, ni vema kuyasikia,
Yatunze yaliyo mema, kazi ukayafanyia,
Pendo lijae hekima, nyote kulifurahia,
Basi ukipenda boga, lipende na ua lake.

Wednesday, October 26, 2011

Nifanyeje uridhike?

Chonde chonde niambie, nini unachokitaka,
Kingine nikufanyie, ambacho utaridhika,
Niambie nitulie, nimechoka kuteseka,
Nifanyeje uridhike, nambie basi nijue.

Ulitaka yako nyumba, nyumba nayo nikajenga,
Mkopo nikaubamba, wewe uache kupanga,
Ukakataa Kibamba, hutaki wala Ukonga,
Ukataka Mikocheni, nikakopa uridhike.

Nikasema njoo Mbeya, haraka ukakataa,
Ukadai ni kubaya, wataka kuishi Dar,
Nami nikasema haya, nikuridhishe haswaa,
Bado wataka Ulaya, Dar hapajakufaa.

Mara ukataka gari, huzitaki daladala,
Tena gari la fahari, hutaki hizo Corolla,
Nikuridhishe vizuri, nikaenda kopa hela,
Gari umeshalipata, wasema hujaridhika.

Nguo nzuri uzipate, likawa lako sharti,
Tena Mlimani City, vinginevyo varangati,
Kabidi nijikung’ute, ‘sije kukuudhi switi,
Nami pesa nikakopa, nguo uweze nunua.

Ukataka simu kali, bei yake milioni,
Tena ukataka mbili, zote ziwe iPhone,
Waijua yangu hali, lakini hatwelewani,
Simu hizo nimekupa, bado wataka vingine.

Ukataka iPad, laptop huitaki,
Nami nikajitahidi, nikakopa pesa benki,
Nikuridhishe waridi, moyoni ‘lotamalaki,
Wasema huna furaha, bado sana kuridhika.

Ndege ukataka panda, tena ya Lufthansa,
Eti unachokipenda, kutalii Ufaransa,
Moyo sasa wanidunda, utadhani nina kansa,
Sikai nikatulia, mahabuba huridhiki.

Nimefanya kila jambo, nadhani nakuridhisha,
Kumbe wafata mkumbo, wapo wanokufundisha,
Nateseka joto tumbo, mwenzangu unajirusha,
Nini zaidi nifanye, nawe uache nitesa?

Tuesday, October 25, 2011

Pole sana Shaaban

Salamu zangu natuma, kwako kipenzi rafiki,
Hali yangu mimi njema, nipo katika mikiki,
Ninamwomba Mungu mwema, akutoe kwenye dhiki,
Pole sana Shaaban, ajali ilokufika.

Hakika nimeshituka, habari kuisikia,
Jasho tele kunitoka, nikatamani kulia,
Kweli nimesikitika, hilo lililotukia,
Pole sana Shaaban, ajali ilokufika.

Rafiki nimeumia, siwezi kuelezea,
Pindi niliposikia, haya yaliyotokea,
Mola ‘takusaidia, twazidi kukuombea,
Pole sana Shaaban, ajali ilokufika.

Twashukuru umepona, ingawa umeumia,
Twafurahi kukuona, hasa yako familia,
Tunamwomba Maulana, afya akakujalia,
Pole sana Shaaban, ajali ilokufika.

Uzima ndiyo muhimu, ndani ya hii dunia,
Daima yatulazimu, huo kuupigania,
Tutimize majukumu, yanayotuangalia,
Pole sana Shaaban, ajali ilokufika.

Mola atakujalia, uweze pona haraka,
Maisha kupigania, kwa kuzidi chakarika,
Mola twa’tumainia, akupe zake baraka,
Pole sana Shaaban, ajali ilokufika.

Shairi hili ni maalumu kwa rafiki yangu na mwanablog mwenzangu Shaban Kaluse aliyepata ajali ya kugongwa na gari leo asubuhi wakati akielekea kazini. Ninamwombe kupona haraka kwa mkono aliovunjika na maumivu mengine aliyoyapata.

Thursday, October 20, 2011

Mpenzi karibu Mbeya

Fanya hima fanya mwaya, uje kunitembelea,
Mie nakusubiriya, moyo wenda peapea,
Mpenzi ufike Mbeya, hamu nawe yazidia,
Mpenzi karibu Mbeya.

Ni kuzuri sana Mbeya, mwenyewe tafurahia,
Wacha maneno mabaya, eti hakujatulia,
Maneno yanowapwaya, mji wautamania,
Mpenzi karibu Mbeya.

Mbeya ni neema tupu, ukija utachanua,
Vyakula wajaza kapu, maradhi hutougua,
Hata ukipenda supu, kuipika ninajua,
Mpenzi karibu Mbeya.

Ardhi ina rutuba, mazao yajiotea,
Utavijaza vibaba, neema waogelea,
Kwetu wala na kushiba, mwenyewe kuchekelea,
Mpenzi karibu Mbeya.

Mbeya utakula ndizi, na makatapera pia,
Mihogo navyo viazi, matembele na bamia,
Wali usotaka nazi, wanoga ninakwambia,
Mpenzi karibu Mbeya.

Mbeya kila kitu kipo, hakika tafurahia,
Maembe hadi maepo, hata na kakao pia,
Na magimbi nayo yapo, wewe yakusubiria,
Mpenzi karibu Mbeya.

Miwa yake ni mitamu, na utaing'ang'ania,
Kwani haiishi hamu, hakika ninakwambia,
Kwakufaa sana humu, hima usijekawia,
Mpenzi karibu Mbeya.

Hali yake burudani, hewa iliyotulia,
Kijibaridi fulani, mwili kichosisimua,
Wala huhitaji feni, kifua kuharibia,
Mpenzi karibu Mbeya.

Mpenzi nakusubiri, Mbeya ndo panakufaa,
Njoo mji ni mzuri, na ukija utang'aa,
Hakika utanawiri, upendeze kila saa,
Mpenzi karibu Mbeya.

Tuesday, October 18, 2011

Mwenziyo sinayo khali

Muhashamu muhashamu, ujumbe nakutumia,
Pokea zangu salamu, za mashamshamu pia,
Nimepatwa na wazimu, siachi kukuwazia,
Mwenziyo sinayo khali, sijiwezi juu yako.

Kama mapenzi ni sumu, basi imeniingia,
Nakesha mang’amung’amu, wewe kukufikiria,
Yanienda kasi damu, moyo h’utaki tulia,
Mwenziyo sinayo khali, sijiwezi juu yako.

Moyo ‘ngekuwa na zamu, nawe ningekupatia,
Uzionje zilo humu, zilivyojaa hisia,
Halisi zilizo tamu, wewe nizo kupatia,
Mwenziyo sinayo khali, sijiwezi juu yako.

Naganda kama sanamu, wewe ninakungojea,
Zingali siku zatimu, moyo khali wasemea,
Kwa pendo hili adhimu, wewe tuu kukupea,
Mwenziyo sinayo khali, sijiwezi juu yako.

Wao wanonituhumu, hawawezi nisumbua,
Kukupenda ‘melazimu, vinginevyo naugua,
Ungali yangu naumu, hapa chini yake jua,
Mwenziyo sinayo khali, sijiwezi juu yako.

Penzi lisilo awamu, kusema litapungua,
Penzi daima dawamu, moyo wangu we chukua,
Kukupenda ni swaumu, pendo nal’ombea dua,
Mwenziyo sinayo khali, sijiwezi juu yako.

Sihesabu tarakimu, penzi linavyozidia,
Bali ni mastakimu, hakuna ‘nokufikia,
Hakuna wa kukaimu, nafasi ‘nokupatia,
Mwenziyo sinayo khali, sijiwezi juu yako.

Uzuri wako adimu, wengi wanaulilia,
Wazikoleza fahamu, daima nakuwazia,
Kukupenda ni jukumu, mwingine sitomwachia,
Mwenziyo sinayo khali, sijiwezi juu yako.

Kwako siishiwi hamu, kila siku wazidia,
Mapishi yako matamu, mtu sito’bakishia,
Hakika wewe mwalimu, cheti nakutunukia,
Mwenziyo sinayo khali, sijiwezi juu yako.

Beti kumi zimetimu, wewe nimekwandikia,
Nitapiga hata simu, maneno nikakwambia,
Daima nitajihimu, wimbo nikakuimbia,
Mwenziyo sinayo khali, sijiwezi juu yako.

Tuesday, October 11, 2011

Ningoje hadi lini?

Mwenzio bado nangoja, ahadi uliyonipa,
Hali yangu reja reja, wala si ya kuchumpa,
Nilishazitowa hoja, basi sinitowe kapa,
Ningoje hadi lini?

Nambie lini wakati, utaponipa majibu,
Moyo kizungumkuti, kwani waupa adhabu,
Hauna tena ukuti, wakusubiri tabibu,
Ningoje hadi lini?

Kwamba nivute subira, nishasubiria sana,
Hadi hali yadorora, usiku nao mchana,
Nitoe kwenye madhara, nishazama kwacho kina,
Ningoje hadi lini?

Jibulo lanipa hamu, hamu ya kulisikia,
Ila sinipe wazimu, chonde sinipe umia,
Likoleze uhashamu, nifurahie dunia,
Ningoje hadi lini?

Usiku wote silali, wewe nakufikiria,
Mwenzio sinayo hali, jibu ninaliwazia,
Chonde mara mbili mbili, niepushie kulia,
Ningoje hadi lini?

Ninakonda ninakonda, nipo hoi taabani,
Chakula kinanishinda, hakinipiti kooni,
Fanya hima kunikanda, unondowe taabuni,
Ningoje hadi lini?

Nieleze yako nia, unondoe wasiwasi,
Nini unadhamiria, mana moyo wenda kasi,
Mwenzio nasubiria, chonde nijibu upesi,
Nimeshangoja sana.

Wednesday, September 28, 2011

Siku nyingi sana

Hakika sijaandika, nanyi hamjanisikia,
Ghafula nikakatika, bila hata kuwambia,
Wengi mkahamanika, nini kimenitukia,
Maswali yakawashika, vipi nimewakimbia,
Siku nyingi sana!

Wapi nilikofichika, hakuna wa kuwa'ambia,
Wapo walokasirika, bakora kunishikia,
Shimoni leo natoka, sitaki kosa rudia,
Mpate kuburudika, yote lowakusanyia,
Siku nyingi sana!

Nyote hapa kusanyika, nianze wahadithia,
Kunako zangu pilika, yote nilojionea,
Hakika tafurahika, khasira kuwaishia,
Hatungoji pambazuka, hivi ndo twajianzia,
Paukwa......!!!

Thursday, September 1, 2011

Moyo wangu

Usiuache mpweke, maumivu kuufika,
Siufanye uteseke, machozi yakanitoka,
Ufanye ufarijike, upe moyo uhakika,
Moyo wangu.

Upatie unafuu, upunguzie mawazo,
Uweke daima juu, sikalie matatizo,
Siupige kwa miguu, na kuupa mizevezo,
Moyo wangu.

Uondolee karaha, siuweke taabuni,
Ufanye kuwa na raha, sizamishe majonzini,
Utawalwe na furaha, cheko tupu maishani,
Moyo wangu.

Usiutendee hivyo, moyo wangu taumia,
Ukitenda ndivyo sivyo, kitanzi utautia,
Vyovyote vile iwavyo, elewa wakuzimia,
Moyo wangu.

Friday, August 26, 2011

Moyoni unatawala

Nasema kila wasaa, maneno nitarudia,
Kamwe sitoyakataa, haya nayosimulia,
Moyoni ushanijaa, moyoni ushaingia,
Moyoni unatawala.

Moyoni mwangu wang'aa, tuli tuli watulia,
Nakupenda wewe maa, hakuna 'nokufikia,
Neno langu si hadaa, leo kweli nakwambia,
Moyoni unatawala.

Silali wala kukaa, pasina kufikiria,
Wewe ndo wewe haswaa, ndotoni naenijia,
Moyo tanienda paa, siku ukinikimbia,
Moyoni unatawala.

Wengine wote kataa, wache kukufatilia,
Mwambie wazi hataa, moyoni 'jakuingia,
Wabaki wakishangaa, sisi tukifurahia,
Moyoni unatawala.

Unatawala kiwaa, dobo na numbula pia,
Bora nikae na njaa, ila kwako kutulia,
Wewe hunayo mawaa, kwa raha nonipatia,
Moyoni unatawala.

Thursday, August 25, 2011

Sauti yangu

Ninataka kuipaza, ilokaza,
Kotekote kueneza, nacho waza,
Wote muje kusikiza, mkiweza,
Nayoeleza!

Kuna mambo yanikwaza, yanumiza,
Kukimya sitokuweza, tonyamaza,
Silali kucha nawaza, nahasiza,
Wanichagiza!

Niaje yazidi oza, yachakaza,
Vyote vyema wamaliza, wakombeza,
Ni lini watabakiza, wandekeza,
Mauzauza!

Sauti yangu napaza, nakataza,
Mola fimbo wacharaza, tena kaza,
Wajutie wao kwanza, wamaliza,
Wavokombeza!

Wednesday, August 3, 2011

Waambie

Ukiwa nao waambie, maneno yawafikie,
Jitahidi wasikie, ujumbe uwafikie,
Ili wasiulizie, bure wasijisumbue,
Waambie hao wote, umenichagua mie.

Wakate vyao vilimi, ikibidi waumie,
Sema wanipenda mimi, waambie wasikie,
Sema mara kumi kumi, sauti iwafikie,
Waambie hao wote, kuwa wanipenda mie.

Hawapendi ninajua, we’ waache waumie,
Wivu unawasumbua, watamani watibue,
Sie tunaomba dua, Muumba atujalie,
Waambie hao wote, umenichagua mi.

Waambie wafitini, na chuki zao walie,
Na wala wasijihini, hawatotuweza sie,
Tumeshazama dimbwini, tumeshanogewa sie,
Waambie hao wote, kuwa wanipenda mie.

We’ waambie mpenzi, yawachome waumie,
Na zidisha kunienzi, ili nifaidi mie,
Niyafaidi mapenzi, pendolo nijivunie,
Waambie hao wote, umenichagua mie.

Mpenzi we’ u mzuri, yeyote asikwambie,
Unanipa ufahari, na raha usisikie,
Nasi twombeane kheri, mapenzi yetu yakue,
Waambie hao wote, kuwa wanipenda mie.

Waseme hata wachoke, wacha tupendane sie,
Kote kote wazunguke, watashindwa wajijue,
Na watake wasitake, siye tuyafurahie,
Waambie hao wote, umenichagua mie.

Hata washikwe na wivu, wenyewe nd’o waumie,
Sie twala zetu mbivu, watwache tufurahie,
Wayapate maumivu, mioyoni waumie,
Waambie hao wote, kuwa wanipenda mie.

Watayasema mchana, ngoja giza liingie,
Watalala tena sana, na ndoto ziwasumbue,
Tutazidi kupendana, watakoma wakomae,
Waambie hao wote, umenichagua mie.

Hujachagua mwingine, isipokuwa ni mie,
Hivyo nasi tupendane, raha na tujipatie,
Wao wahangaishane, sie wasitufikie,
Waambie hao wote, kuwa wanipenda mie.

Waambie wasikie, nenolo liwainngie,
Tena wasijisumbue, mapenzi ni yetu sie,
Waumie siumie, tunajivinjari sie,
Waambie hao wote, umenichagua mie.

Waambie wasikie!

Saturday, July 30, 2011

Muwe kwangu marafiki

Nahitaji marafiki,
Ambao watanijali, bila unafiki,
Si kwa ajili ya mali, nami nina dhiki,
Bali kwa pendo la kweli, lisilo na taki,
Muwe kwangu marafiki.

Nahitaji marafiki,
Mie ninatawasali, wawe hata laki,
Sitofanya tasihili, kutaka lahiki,
Niombe ardhilhali, kukosa sitaki,
Muwe kwangu marafiki.

Nahitaji marafiki,
Ninamuomba Jalali, nipate lukuki,
Watoke kote mahali, iwe halaiki,
Nitawafanya halili, watatamalaki,
Muwe kwangu marafiki.

Nahitaji marafiki,
Ninawahitaji kweli, muwe marafiki,
Najua mtajamali, ‘sininyweshe hiyo siki,
Siyo maneno makali, nikiishindwa mikiki,
Muwe kwangu marafiki.

Nahitaji marafiki,
Tupendane kila hali, wenye tamaa sitaki,
Naahidi kuwajali, kwazo raha nazo dhiki,
Pamoja tustahimili, yayo maisha mikiki,
Muwe kwangu marafiki.

Nahitaji marafiki,
Nitawafanya aghali, fakhari kuwamiliki,
Duwa zangu mbili mbili, mpate kile na hiki,
Mola wangu tafadhali, wawe wengi halaiki,
Muwe kwangu marafiki.

Thursday, July 28, 2011

Mimi kwako nimetuwa

Ndege daima hutua, kwenye mti apendao,
Ndege hatojisumbua, mti auchukiao,
Ndege yeye huchagua, mmea autakao,
Mimi kwako nimetuwa.

Nimeruka miti yote, nimetuwa kwako wewe,
Nipe moyo wako wote, ili kwangu uchanuwe,
Raha kamili nipate, nisiende kwinginewe,
Mimi kwako nimetuwa.

Kwako wewe nimetuwa, mi’ sijamwona mwingine,
Wewe nimekuchaguwa, nahitaji tupendane,
Moyo wangu nautowa, siupeleki kwingine,
Mimi kwako nimetuwa.

Kutuwa nimeridhika, nimeamua mwenyewe,
Ninasema kwa hakika, napenda unielewe,
Mimi kwako nimefika, sifikiri kwinginewe,
Mimi kwako nimetuwa.

Kwako wewe sina shaka, moyo umenituwama,
Namwomba wetu Rabuka, atujalie salama,
Tufurahi na kucheka, pote panapo uzima,
Mimi kwako nimetuwa.

Nawe pia usihofu, kwani u chaguo langu,
Nikupende maradufu, wewe u sehemu yangu,
Naahidi hutokifu, kwenye huu ulimwengu,
Mimi kwako nimetuwa.

Wazia kuhusu mimi, ukihitaji furaha,
Lilo langu sikunyimi, nitakupa lilo weha,
Makumi kwayo makumi, daima uwe na raha,
Mimi kwako nimetuwa.

Mimi nd’o unieleze, yale yanaokusibu,
Kwa upendo nisikize, nitowe yalo majibu,
Njia nikuelekeze, we’ ulo wangu muhibu,
Mimi kwako nimetuwa.

Mimi ndiye ndege wako, kwako nimekwisha tuwa,
Kokote kule twendako, tupendane tavyokuwa,
Tuzishinde chokochoko, zao wanojisumbuwa,
Mimi kwako nimetuwa.

Tuesday, July 26, 2011

Hadi lini?

Ahadi mtazitowa, msizo zitekeleza?
Mambo mtayazodowa, na kisha kuyachagiza?
Tazidi pata madowa, kisha kujibaraguza?
Hadi lini, mtwambie!

Takumbata mafisadi, maovu mkayakuza?
Mtafanya makusudi, wananchi kuwapuza?
Mtaacha ukaidi, ukweli kutueleza?
Hadi lini, mtwambie!

Taleta maendeleo, siyo kujilimbikiza?
Takemea nyendo zao, wale wanotuumiza?
Taviondoa vilio, wagonjwa wan'oj'uguza?
Hadi lini, mtwambie!

Tuwangoje hadi lini, maana mwatuchokeza,
Semeni haya semeni, twataka wasikiliza,
Mwatutesa mioyoni, vidonda vazidi oza,
Hadi lini, mtwambie!

Hadi lini mtwambie, sana 'metunyong'onyeza,
Msitwache tuumie, siku tawatokomeza,
Yafaa mtusikie, nasi mkaja tuguza,
Hadi lini, mtwambie!

Mbona hamna huruma, tamaa tawamaliza,
Mwachota bila kupima, hamjui kubakiza,
Lini mtakuwa wema, taifa kutongamiza,
Hadi lini, mtwambie!

Hatukufundishwa hivyo, Mwalimu 'livyo'lekeza,
Hivyo sasa mfanyavyo, somo mshalipuuza,
Hivi ndivyo mpendavyo, maadili yalooza,
Hadi lini, mtwambie!

Kila siku twawambia, mngali mwajendekeza,
Mmeharibu tabia, watot'wenu mwawafunza,
Nao weharibikia, kila kitu wakombeza,
Hadi lini, mtwambie!

Nani huyo kawaroga, tuje tukamcheteza,
Maana mwamwaga mboga, ugali mwahanikiza,
Mtamaliza maboga, mkabaki mwamwagaza,
Hadi lini, mtwambie!

Hadi lini mtwambie, tumechoka kungojeza,
Hadi lini twandikie, msopenda kusikiza,
Aibu iwaingie, ili muje kutweleza,
Hadi lini, twambieni!

Monday, July 25, 2011

Duuh!

Sitaraji jambo jema,
Kama hujawa makini,
Singoje yao huruma,
Jiulize ni ya nini?

Wala usijidanganye,
Ukadhani umefika,
Tena usijichanganye,
Pamoja nao vibaka.

Wao siyo watu wema,
Ni vema kujihadhari,
Kwao wala si salama,
Kumejaa nayo shari.

Sitaraji ihsani,
Kwani hawana fadhila,
Wamejaa nuksani,
Ha’mwogopi hata Mola.

Tuliwapa madaraka,
Kwa hizo ahadi zao,
Wameguka vibaka,
Kujali matumbo yao.

Wameuleta ugumu,
Katika maisha yetu,
Lazima tuwalaumu,
Tuliwapa kura zetu.

Leo wala hawajali,
Watwona hatuna ma’na,
Lazima tuseme kweli,
Kwa marefu na mapana.

Tunataka nani aseme,
Ndipo wao wasikie?
Ama hadi twandamane,
Ndipo wakatufyatue?

Ukweli huwa ukweli,
Hata ungefichwa vipi,
Uwekwe marashi ghali,
Ungali haukwepeki.

Kweli wametuangusha,
Tena kwa anguko kuu,
Bora kujirekebisha,
Majuto ni mjukuu!

Wednesday, July 20, 2011

Usingizi siupati

Usiku mie silali, sina hali,
Mwenziyo sinayo khali, hata sili,
Chakula mwenziyo sili, ni ukweli,
Nakuwaza wewe!

Usingizi siupati, wa manati,
Zito langu blanketi, bati bati,
Nawaza kila wakati, varangati,
Wewe upo mbali!

Bora 'ngekuwa karibu, eeh muhibu,
Yatoke yan'onisibu, masahibu,
Penzi lisiniadhibu, kwa irabu,
Kwako nimefika!

Mwingine mie simwoni, hakya nani,
Watawala mawazoni, na moyoni,
Nikutunze kama mboni, ya thamani,
Uwe furahani!

Saturday, July 16, 2011

Kalamu inaandika

Dada kamwambie kaka, awe na amani,
Wote walohuzunika, kuwa s'onekani,
Kalamu ilotoweka, ipo kibindoni,
Sasa mchakamchaka.

Kalamu inaandika, winowe pomoni,
Usome pasi kuchoka, 'furahi moyoni,
Upate kuelimika, ma'rifa kichwani,
Sote tukijumuika.

Kiswahili chasifika, hata uzunguni,
Na tena kimeshafika, Sudani Kusini,
Lugha 'staarabika, ya watu makini,
Wan'oheshimika.

Karibuni watukuka, sana karibuni,
Sote tukaburudika, tungo kinyumbani,
Karibuni pasi 'choka, hapa jamvini,
Pamoja tukatunguka.

Kalamu haitochoka, 'subuhi jioni,
Labda 'tapotoweka, humu duniani,
Nisiweze kuandika, nimelala chini,
Ila mtahuzunika.

Sunday, July 10, 2011

Yangu kalamu

Nimeshikwa na wazimu, jambo gumu,
Nahitaji kufahamu, mumu humu,
Ni nani nimtuhumu, ana sumu,
I wapi yangu kalamu?

Kitambo sijaandika, kwa hakika,
Kalamu wapi 'meweka, 'taka saka,
Ama ilikwishachoka, takataka,
I wapi yangu kalamu?

Njoo wewe nikwulize, nieleze,
Ilipo nielekeze, 'sin'cheze,
Jambo nataka juze, wasi'kize,
I wapi yangu kalamu?

Isake kwa'yo busara, si hasira,
Visiwani ama Bara, wastara,
Nataka ile imara, ilo bora,
I wapi yangu kalamu?

Iletwe kalamu hima, n'weze sema,
Ifike hapa mapema, 'sije goma,
Sitaki kupata homa, hujasoma,
I wapi yangu kalamu?

Monday, May 16, 2011

Uwa moyoni mwangu

Unachanua moyoni, wachanua wavutia,
Zaidi ya jasimini, wachanua kuzidia,
Ni fahari yazo mboni, zenye kukuangalia,
U uwa moyoni mwangu.

Wachanua kama waridi, ila wewe wazidia,
Watu hawaishi hodi, uwa walitamania,
Wa radhi walipe kodi, jinsi unavyovutia,
U uwa moyoni mwangu.

Wang'ara wewe wang'ara, wang'ara na kuzidia,
Wang'ara watia fora, wang'ara na kuvutia,
Wang'ara wewe wang'ara, siachi kukuwazia,
U uwa moyoni mwangu.

Hakika una mvuto, yeyote kumzuzua,
Kwa mapenzi motomoto, kukukosa naugua,
Naugua homa nzito, mganga hatoagua,
U uwa moyoni mwangu.

Moyoni wewe ni pambo, pambo linalovutia,
Lililozidi urembo, hata moyo kutulia,
U uwa lenye ulimbo, hata nami kunasia,
U uwa moyoni mwangu.

Moyoni mwangu u uwa, kupata najivunia,
Uwa linonizuzuwa, uwa naloliwazia,
Uwa nililochaguwa, uwa la kufurahia,
U uwa moyoni mwangu.

Tuesday, April 19, 2011

Mawazoni mwangu

Fikra hutawala mtima wangu,
Kwa madhila yalojaa duniani,
Kwa muhali wa yanayojiri,
Kwa machweo na mawio,
Kwa totoro ama nuruni,
Nao moyo hukosa ukamilifu,
Kwa utashi wa zake hisia,
Zinipazo sababu kuu,
Ya upendo juu yako,
Ya kukufanya daima uwe,
Mawazoni mwangu.

Mawazoni ama ndotoni,
Daima wewe hutawala,
Kila asubuhi niamkapo,
Nao usiku nilalapo,
U chakula changu akilini,
Nalo tulizo langu moyoni,
Daima huuwaza upekee,
Wewe uliojaaliwa,
Na hivyo naihisi furaha,
Daima wewe uwapo,
Mawazoni mwangu.

Thursday, April 7, 2011

Ulimi huponza kichwa

Ulimi kitu kidogo, ila huleta balaa,
Huibua sana zogo, kwao ndugu na jamaa,
Hata kupewa kisago, kuonekana mnaa,
Ulimi huponza kichwa, wahenga walishasema.

Chunga, chunga sana chunga, maneno unoongea,
Sipende sana kuchonga, kila unachokijua,
Vema maneno kutenga, mengine kuyamezea,
Ulimi huponza kichwa, wahenga walishasema.

Katu siwe chakuchaku, domo kama cherehani,
Kubwaja huku na huku, maneno tele sokoni,
Maneno siyo kiduku, yakupe umajinuni,
Ulimi huponza kichwa, wahenga walishasema.

Busara haiji bure, kwa kupenda kuropoka,
Kujipa kiherehere, kila pahala kushika,
Kujitia ubwerere, kinywa chako kufunguka,
Ulimi huponza kichwa, wahenga walishasema.

Ulimi una madhara, bora kujiangalia,
Huziamsha hasira, hata chuki kuingia,
Ulimi ndio kinara, maneno ya kuzushia,
Ulimi huponza kichwa, wahenga walishasema.

Ulimi husababisha, vita watu kupigana,
Maneno kuchonganisha, hata watu kuuana,
Kwa maneno ya kuzusha, jamaa huchukiana,
Ulimi huponza kichwa, wahenga walishasema.

Ulimi u mdomoni, siutoe kila mara,
Vema uuache ndani, kuyaepuka madhara,
Utakuwa na amani, na msimamo imara,
Ulimi huponza kichwa, wahenga walishasema.

Friday, March 25, 2011

Pumzika kwa amani, Asifiwe Ngonyani

Asifiwe! Asifiwe! sauti zetu sikia,
Asifiwe! Asifiwe! kweli unatusikia?
Asifiwe! Asifiwe! mbona hujaitikia?

Asifiwe umekwenda, dunia 'meikimbia,
Wajua tulikupenda, ila Mungu kazidia,
Mauti yamekutenda, wewe umetangulia,
Pumzika kwa amani, Asifiwe Ngonyani.

Umetwachia majonzi, hakika twakulilia,
Tumejawa na simanzi, hatuwezi elezea,
Mdogo wetu mpenzi, uchungu 'metuachia,
Pumzika kwa amani, Asifiwe Ngonyani.

Ulijawa na adabu, nao ukarimu pia,
Kwa wako utaratibu, ni nuru imepotea,
Umekwenda kama bubu, kwa heri hukutwambia,
Pumzika kwa amani, Asifiwe Ngonyani.

Wewe mtu mwuungwana, kwa njema yako tabia,
Tulikupenda kwa sana, nd'o maana twaumia,
Mfano wako hakuna, kwa pengo kulizibia,
Pumzika kwa amani, Asifiwe Ngonyani.

Kuondoka kwatuliza, kila tukifikiria,
Twatamani tungeweza, kifo tungekizuia,
Mwaka huu kumaliza, nayo inayof'atia,
Pumzika kwa amani, Asifiwe Ngonyani.

Lakini sisi ni nani, Mungu tukamwamulia?
Tukamwuliza kwa nini, wewe amekuchukua?
Mwamuzi ndiye Manani, aloiumba dunia,
Pumzika kwa amani, Asifiwe Ngonyani.

Pengo halitozibika, wewe ulotuachia,
Daima 'takukumbuka, wema'wo kusimulia,
Tukimwomba Rabuka, mwanga kukuangazia,
Pumzika kwa amani, Asifiwe Ngonyani.

Upumzike salama, kwa Mola twakuombea,
Akupe pahala pema, nuru kukuangazia,
Asifiwe mtu mwema, buriani twakwambia,
Pumzika kwa amani, Asifiwe Ngonyani.

Shairi hili nimeliandika maalumu kwa marehemu Asifiwe Ngonyani, mdogo wa kike wa dada yetu, rafiki yetu na mwanablog mwenzetu Yasinta Ngonyani. Asifiwe alipatwa na mauti Jumatano 23.03.2011.
Asifiwe umetuacha kimwili tu, kiroho tungali pamoja nawe. Tunakuombea pumziko salama la milele.
Amina.

Saturday, March 12, 2011

Unanikumbuka?

Unanikumbuka?
Hivi nivyoadimika,
Kitambo sijasikika,
Tungo sijaziandika,
Wewe nikakutumia.

Kwani waniwaza?
Ukimya kukuumiza,
Yeyote kumuuliza,
Apate kukueleza,
Nini kimenitokea.

Kwani watamani?
Nitoke huku shimoni,
Nikiseme mdomoni,
Furaha iwe moyoni,
Moyowo ukatulia.

Nini unachokipenda?
Roho iache kudunda,
Homa sikupe kukonda,
Ujuwe ninakupenda,
Upendo ulozidia.

Wanitaka nikwambie?
Moyo wao utulie,
Wengine wanisikie,
Nawe uufurahie,
Upendo ulozidia.

Niambie basi!

Wednesday, February 2, 2011

I wapi?

Ile ahadi yako,
Kuwa tungekuwa pamoja,
Kwa shida ama raha,
Ungenishika mkono,
Kwa mwambo,
Kwa machweo,
Kwa mawio,
Unishike mkono,
Nichechemee.

Ile ahadi yako,
Kuwa tungekuwa pamoja,
Tambarare ama kilimani,
Ungenishika mkono,
Jangwani,
Nyikani,
Ama baharini,
Unishike mkono,
Nisizame.

I wapi?
Nioneshe sasa!

Saturday, January 29, 2011

Mola naomba hekima

Dunia inayo mambo, mambo yenye kuzidia,
Mambo kujaa vijambo, utaijua dunia,
Bora 'sifate mkumbo, mambo huleta udhia,
Mola naomba hekima, nikabili haya mambo.

Mola naomba hekima, ili niweze tulia,
Nifunze yaliyo mema, na si mtu kumwonea,
Mdomo usije sema, jambo sijafikiria,
Mola naomba hekima, nikabili haya mambo.

Mola naomba busara, iweze nitangulia,
Nisiifanye papara, mambo yanayonijia,
Unepushie hasira, kichwa kipate tulia,
Mola naomba hekima, nikabili haya mambo.

Mola naomba upole, nao uungwana pia,
An'udhipo mtu yule, ngumi sijemrushia,
Bali nitazame mbele, pasi baya kufanyia,
Mola naomba hekima, nikabili haya mambo.

Mola naomba subira, jambo kutopapakia,
Nifanye niwe imara, mwili na akili pia,
Niepushie madhara, niepushie kulia,
Mola naomba hekima, nikabili haya mambo.

Naomba uvumilivu, hata kwenye kuamua,
Yanipayo maumivu, yale wewe wayajua,
Naomba yalo angavu, n'epushe ya kusumbua,
Mola naomba hekima, nikabili haya mambo.

Mola naomba hekima, nikabili haya mambo,
Mola niweke salama, niwashinde wenye tambo,
Mola naomba uzima, furaha ikawe wimbo,
Mola naomba hekima, nikabili haya mambo.

Tuesday, January 18, 2011

Mama

Mama wewe ni zawadi, ya maisha duniani,
Kwao wowote weledi, wewe unayo thamani,
Kwazo zako juhudi, nikaja ulimwenguni,
Mama wewe ni zawadi, kutoka kwake Muumba.

Kwa malezi yako bora, daima huna kifani,
Kwa zako tele busara, na mwongozo maishani,
Mama wewe ni kinara, nuru yangu maishani.
Mama wewe ni zawadi, kutoka kwake Muumba.

Mama faraja yangu, pindi niwapo shidani,
Hunipooza machungu, moyoni iwe amani,
Nakuombea kwa Mungu, heri tupu duniani,
Mama wewe ni zawadi, kutoka kwake Muumba.

Daima hunipa nguvu, ninapodondoka chini,
Nipatapo maumivu, daima huwa pembeni,
Naupata uangavu, uniwekapo salani,
Mama wewe ni zawadi, kutoka kwake Muumba.

Mama u rafiki mwema, mwingine hapatikani,
Wajali pasi kupima, wajali bila rehani,
Mama nakupenda mama, kutoka mwangu moyoni,
Mama wewe ni zawadi, kutoka kwake Muumba.

Hakuna cha kukulipa, wala hakionekani,
Chochote nitachokupa, hakifikii thamani,
Sala naiweka hapa, akubariki Manani,
Mama wewe ni zawadi, kutoka kwake Muumba.

Mola akujaalie, yalo mema duniani,
Baraka akujazie, akujazie pomoni,
Mabaya akwepushie, ukawe mwenye amani,
Mama wewe ni zawadi, kutoka kwake Muumba.


Heri ya siku ya kuzaliwa mama yangu. Mwenyezi Mungu akupe miaka mingi zaidi. Ninakupenda sana.

Nimeandika shairi hili maalumu kwa mama yangu na akina mama wengine wote. Ninyi ni zawadi za thamani zaidi ambazo mwanadamu hupata kuwa nazo. Lazima mjivunie kuwa kina mama kwa kuwa sisi mliotuzaa, tunawapenda sana kwa hakika. Mungu awabariki sana.

Sunday, January 16, 2011

U pekee duniani

Mpenzi nakusifia, uzuri wa malaika,
Urembo ulozidia, hakika umeumbika,
Nami ninajivunia, kwako wewe nimefika,
U pekee duniani.

Hakika we u mzuri, kwa sifa zenye kujaa,
Kama nyota alfajiri, maishani unang'aa,
Uzuriwo u dhahiri, hakuna anokataa,
U pekee duniani.

Unayo sauti tamu, nyoka kutoka pangoni,
Mejaa mashamshamu, utamu masikioni,
Huniletea wazimu, kusisimuwa moyoni,
U pekee duniani.

Una rangi asilia, yang'ara kama dhahabu,
Rangi iliyotulia, wengine yawapa gubu,
Sichoki kukusifia, wewe ndo wangu muhibu,
U pekee duniani.

Macho kama ya goroli, na mapole kama njiwa,
Sifa wazistahili, kwani umebarikiwa,
Leo nasema ukweli, wanifanya kunogewa,
U pekee duniani.

Mwendo wako wa kuringa, mrembo mwendo mwendole,
Moyo wangu waukonga, waujaza raha tele,
Nipo radhi kukuhonga, sikupate watu wale,
U pekee duniani.

Sifa zako zimezidi, wewe u nambari wani,
Wewe kwangu maridadi, mwingine simtamani,
Nakupa yangu ahadi, daima 'takuthamini,
U pekee duniani.

Wewe wanipa sababu, kufurahia mapenzi,
Wako ustaarabu, hakika nitakuenzi,
Kukutunza ni wajibu, udumu wetu upenzi,
U pekee duniani.

Thursday, January 13, 2011

Lini utakuwa wangu?

Siupati usingizi, mwenzio nafikiria,
Nipo hoi sijiwezi, wewe tu nakuwazia,
Napenda niwekwe wazi, kwani nazidi umia,
Lini utakuwa wangu, tena wangu peke yangu?

Mawazo yanikondesha, nakonda sijitambui,
Homa unanipandisha, juu yako sijijui,
Jibu walichelewesha, hata mlo sichukui,
Lini utakuwa wangu, tena wangu peke yangu?

Nambie nikusikie, nikusikie jamani,
Niepushe nisilie, niweke mwako moyoni,
Na mie nijisikie, ninapendwa duniani,
Lini utakuwa wangu, tena wangu peke yangu?

Lini utanikubali, ili niache teseka,
Nambie basi ukweli, niache kuweweseka,
Wajua sinayo hali, kwako wewe nimefika,
Lini utakuwa wangu, tena wangu peke yangu?

Lini utanipa jibu, moyo upate tulia,
Ukimya wako adhabu, wanifanya kuumia,
Yaseme yalo irabu, kuwa wanikubalia,
Lini utakuwa wangu, tena wangu peke yangu?

Lini utanikubali, nambie nifurahie,
Wala usiende mbali, juu yangu jisikie,
Upendo ulo aghali, penzi nikuhifadhie,
Lini utakuwa wangu, tena wangu peke yangu?

Usikubali kwingine, peke yangu nakufaa,
Njoo kwangu tupendane, mapenzi yenye kung'aa,
Tupendane tufaane, moyoni umenijaa,
Lini utakuwa wangu, tena wangu peke yangu?

Monday, January 10, 2011

Siogopi kukupenda

Siogopi kukupenda, hata watu wakisema,
Kukukosa ninakonda, mwilini ninayo homa,
Moyo mbio wanienda, nisikwone siku nzima,
Siogopi kukupenda, hata watu wakisema.

Moyo wangu una wewe, tele tele umejaa,
Ningepatwa na kiwewe, kama ungenikataa,
Mapenzi yote nipewe, nipende kila wasaa,
Siogopi kukupenda, hata watu wakisema.

Maneno nishasikia, yapo tokea kitambo,
Kwa wivu wanaumia, kukukosa ee mrembo,
Kwangu umesharidhia, huhitaji tena nyimbo,
Siogopi kukupenda, hata watu wakisema.

Waseme yote mchana, walale hapo usiku,
Mioyo yawanyongona, imejaa dukuduku,
Sisi tunavyopendana, wamebaki zumbukuku,
Siogopi kukupenda, hata watu wakisema.

Raha kwako naipata, hakika nimeridhika,
Kwako hakuna matata, moyo wangu umefika,
Usiku ninakuota, kwako naliwazika,
Siogopi kukupenda, hata watu wakisema.

Upendo uso kipimo, wewe nimekupatia,
Moyo unalo tuwamo, raha naipata pia,
Kwenye moyo wangu umo, raha yangu ya dunia,
Siogopi kukupenda, hata watu wakisema.

Wenye kusema waseme, waseme hadi wachoke,
Roho zao ziwaume, ziwaume wakereke,
Mioyoni ziwachome, wachomeke wakauke,
Siogopi kukupenda, hata watu wakisema.

Wenye wivu uwashike, uwashike uwagande,
Zaidi wahuzunike, wahuzunike wakonde,
Chakula kisiwashuke, wacha mie nikupende,
Siogopi kukupenda, hata watu wakisema.

Ni raha mwangu moyoni, wewe kuwa ndiwe wangu,
Nimezama furahani, rahani chini ya mbingu,
Sisi tumo mapenzini, tuache ya walimwengu,
Siogopi kukupenda, hata watu wakisema.

Friday, January 7, 2011

Tanzania Tanzania

Ukitazama ramani, utaona nchi nzuri,
Ilotamba duniani, ilo na watu wazuri,
Nchi yenye uthamani, ilotupa ufahari,
Tanzania Tanzania, ni wapi twaelekea?

Ilitujua dunia, sie nchi ya amani,
Wote wakatusifia, wengi wakatutamani,
Nchi iliyotulia, yenye raia makini,
Tanzania Tanzania, ni wapi twaelekea?

Kote walikopigana, walikimbilia kwetu,
Hatukuhasimiana, tulijaaliwa utu,
Pamoja kila namna, umoja baina yetu,
Tanzania Tanzania, ni wapi twaelekea?

Tukawa wapatanishi, na wakatusikiliza,
Waliokuwa wabishi, mema tukawaeleza,
Hawakutwona wazushi, kwa sifa tulipendeza,
Tanzania Tanzania, ni wapi twaelekea?

Hakukuwa uhasama, sababu ya madaraka,
Tulitumia hekima, hata tukakubalika,
Viongozi walo wema, hatamu waliishika,
Tanzania Tanzania, ni wapi twaelekea?

Hali imebadilika, Tanzania ipo wapi?
Damu inayomwagika, tumejifunzia wapi?
Mabavu yanotumika, yanatupeleka wapi?
Tanzania Tanzania, ni wapi twaelekea?

Tuseme ndiyo tamaa, yao wetu viongozi?
Ukweli waukataa, ila wao wapagazi,
Pakacha lilochakaa, tuseme hawaliwezi?
Tanzania Tanzania, ni wapi twaelekea?

Tunapoimwaga damu, mioyoni tuna nini?
Nani katulisha sumu, atupe na insulini?
Tupone huu wazimu, ulojaa akilini,
Tanzania Tanzania, ni wapi twaelekea?

Myoyo yajisikiaje, haya yanayotokea?
Upeo watwambiaje, njia twayoelekea?
Wengine watuoneje, kipi tutwaelezea?
Tanzania Tanzania, ni wapi twaelekea?

Hatukuzowea vituko, hivi vyao watawala,
Tena haya machafuko, hayakutokea wala,
Kote kule uendako, amani ilitawala,
Tanzania Tanzania, ni wapi twaelekea?

Nalilia Tanzania, amani inapotea,
Walafi wameingia, hawawezi jionea,
Umoja watukimbia, wenyewe wachekelea,
Tanzania Tanzania, ni wapi twaelekea?

Machozi yananitoka, nchi ninaililia,
Maana imechafuka, mabaya yanatukia,
Madaraka madaraka, kwa wenye kung'ang'ania,
Tanzania Tanzania, ni wapi twaelekea?

Wamenogewa kahawa, wanataka na kakao,
Huona nongwa kugawa, waipate na wenzao,
Nchi yakosa usawa, uhuru ndotoni mwao,
Tanzania Tanzania, ni wapi twaelekea?

Tumjibu nini Mungu, kwau wetu upuuzi?
Kuifanya nchi chungu, tuulinde uongozi,
Amani ile ya tangu, kuitunza hatuwezi,
Tanzania Tanzania, ni wapi twaelekea?

Mungu tumjibu nini, nyie ninawauliza,
Bila huruma myoyoni, nchi mwaiangamiza,
Mwaipata raha gani, binadamu kuwaliza?
Tanzania Tanzania, ni wapi twaelekea?

Nchi tuliyoachiwa, sasa tunaichezea,
Wenzetu wamenogewa, utu umewapotea,
Hawana la kuambiwa, vyeo vimewanogea,
Tanzania Tanzania, ni wapi twaelekea?

Muumba tumrudie, kwani tumemkosea,
Ili atusaidie, kubaya twaelekea,
Eeh Mungu utusikie, nchi yatuelemea,
Tanzania Tanzania, siachi kukulilia.