Monday, October 5, 2009

Upweke

Upweke jama adhabu, upweke unasumbua,
Upweke ni maghilibu, kukufanya kuugua,
Watamani wa karibu, nenolo taelijua,
Upweke.

Upweke hutesa sana, umpendaye awe mbali,
Utamuwazia sana, hata mara alfu mbili,
Kwa usiku na mchana, maumivu ni makali,
Upweke.

Upweke unakondesha, chakula hukitamani,
Upweke unahenyesha, simanzi tele moyoni,
Homa pia hupandisha, na mwokozi humuoni,
Upweke.

Upweke tele mateso, hata machozi kulia,
Moyoni ni manyanyaso, nao moyo kuumia,
Wala si kimasomaso, kwani huleta udhia,
Upweke.

Upweke ni kama jela, huleta nyingi simanzi,
Huwezi hata kulala, maisha tele majonzi,
Utapiga hata sala, uruke vyote viunzi,
Upweke.

Upweke sawa na shimo, mtu ukatumbukia,
Nako shimoni uwamo, wateswa nayo dunia,
Kwani hauna makamo, kuweza kuvumilia,
Upweke.

6 comments:

  1. Afadhali kuumwa kichwa kuliko kuwa mpweke. Maana ukuwa mpweke basi unakuwa na mawazo chungu nzima. Shairi hili limetulia kweli na kama u mpweke ukisoma hili upweke unapungua,

    ReplyDelete
  2. Aisifuye mvua imemnyea! Pole sana mkuu lkn usijari sana kwani kila mtihani majibu yake yapo mhimu uvumilivu! Hata wote wakikuacha MUNGU yuko nawe daima.

    ReplyDelete
  3. Inasemekana lakini kuwa UPWEKE ndio kijulisho bado unapenda kwa kuwa kwa kuzoea upendacho kipo unaweza usijistukie umeshaacha kukipenda!

    ReplyDelete
  4. nilidhani mpweke ni mimi
    nilidhani niko peke yangu
    nilihdani ninayo kasoro
    ukweli nilikosea, tulio wapweke tuko wengi

    ReplyDelete
  5. UPWEKE SAWA NA JOKA
    LIUMALO POLE POLE

    HUTOKOMA KUTESEKA
    MOYONI HUZUNI TELE

    SURAYO TASAWIJIKA
    MAWAZO YAKUTAWALE


    UPWEKE MARADHI SIYO
    USIOMBE UKUKUMBE

    ReplyDelete