Friday, July 10, 2009

Ilani

Kitanda usikiache, nje ukakimbilia,
Ukatema zako cheche, kwingine kuzitumia,
Usipandikize miche, holela kujiotea.

Pia usingoje kuche, ili uruke na njia,
Nyumbani usikukache, mbali kukakunogea,
Nje usiwapekeche, wako nani wamwachia?

Hiyo ya nje mikweche, shida itakuletea,
Itasababisha wiche, ukabaki jijutia,
Usijifanye mkoche, huko ukachokonoa.

Maisha ni siku chache, ndani ya hii dunia,
Chakula cha nje kiache, wadudu wameingia,
Ni kheri nisikufiche, kwa maneno kukwambia.

7 comments:

  1. Det är sant man lever bara en gång här i jorden. Tack för den fina dikten.

    ReplyDelete
  2. Ni kweli da Yasinta, binadamu huishi mara moja tu katika hii dunia.
    Nami nakushukuru sana kwa nasaha zako muktadha.

    ReplyDelete
  3. Hapana kurukaruka, takuja kuanguka.
    Wadudu tawakaribisha,maisha kuyafupisha.
    Ile moja anatosha,
    nje takanyaga miwaya.

    ReplyDelete
  4. Hapana kurukaruka, mwishowe uta anguka.
    Wadudu tawakaribisha,maisha kuyafupisha.
    Ile moja anatosha,
    nje takanyaga miwaya.

    ReplyDelete
  5. Mtanga kamaradia
    Ukweli umewasilia
    Faida kutugawia
    Ujumbe kutumwagia

    Naomba nikusaili
    Kidogo sekunde mbili
    Vibaya kushika mbili
    Kama ndumilakuwili

    Ukweli wajulikana
    Kitanda kukikana
    Mbona bado twabanana?
    Wengine kushikamana!

    Kuchovya kubaya sana
    Hili twalijua sana
    Bado najiuliza sana
    Mbona twachovya sana?

    ReplyDelete
  6. Yasinta tumesikia,
    Ni kweli kwenye dunia,
    Mara moja hutokea,
    Kamwe haitorudia.

    Kissima mwenye hekima,
    Uzuri nimekusoma,
    Ni vema watu wazima,
    Haya tukayasikia.

    Usigune Mumyhery,
    Vema watu wafikiri,
    Nyendo nyingi siyo nzuri,
    Kisha kesho kuumia.

    E Mwanasosholojia,
    Ujumbe naupokea,
    Na wote wamesikia,
    Ni vema kutorudia.

    ReplyDelete