Monday, June 29, 2009

Kidole kimoja

Kidole hicho kimoja, hakiwezi vunja chawa,
Hata ukikikongoja, bado hutofanikiwa,
Hata hiyo ngoja ngoja, matumbo huyasumbuwa,
Hicho kidole kimoja.

Chakula cha peke yako, radha haijatimia,
Ukiwa naye mwenzako, hakika 'tafurahia,
Hata kote uendako, nawe utajivunia,
Hicho kidole kimoja.

Huna haja ya kuwaza, na usingizi kukosa,
Yupo wa kukuliwaza, hata kukupa hamasa,
Yeye utamueleza, yale yanayokutesa,
Hicho kidole kimoja.

Upweke unayo sumu, siyo vema kuipata,
Mpe yeye umuhimu, jasho lako atafuta,
Mwache akupe wazimu, ila jiepushe juta,
Hicho kidole kimoja.

Kimoja hicho kidole, mbona kitakusumbua,
Na usiku usilale, na homa ukaugua,
Ukatamani ya wale, kama wewe ungekua,
Hicho kidole kimoja.

Kidole hicho rafiki, peke yake hakiwezi,
Usijipe bure dhiki, mpe yule akuenzi,
Kiona haambiliki, usimpe yako kazi,
Hicho kidole kimoja.

Kimoja ni bora kiwe, kuliko kujiumiza,
Ujitoe bure wewe, yeye akakuchagiza,
Nasema ni bora iwe, kuliko ukateleza,
Hicho kidole kimoja.

3 comments:

  1. Umoja ni nguvu,
    utengano udhaifu,
    mwenyewe siwezi jisifu,
    utengano si mali kitu,
    umoja kila kitu.

    ReplyDelete